Naalakkersuisut: Pensionisiat iluarsiiffigineqassapput
Pensionisiat naleqqussarneqannginnissaannik saqqummiussineq eqqortuunngilaq. Ingerlaannartuminguna naleqqussaasarnissamik siunnersuut tunuartinneqartoq.
Pensionisiat akissaatit qaffakkiartornerannut malinnaatinneqartarput, Naalakkersuisut tusagassiorfinnut nalunaaruteqarnerminni erseqqissaatigaat.
Naalakkersuisut pensionisiat akitsuutillu naleqqussarneqartarnissaannut siunneersuummik tunuartitsisimanerat pillugu ilanngutassiami Sermitsiaq.AG-p pensionisiat naleqqussarneqartussanngitsutut saqqummiuppaa. Tamannali eqqortuunngilaq.
Siunnersuummi tunuartinneqartumi pineqarpoq, akigititat akissaatillu qaffattarnerat ilutigalugu pensionisiat ingerlaannartumik naleqqussarneqartarnissaat. Qaffaassutit annertussusaasa Naatsorsueqqissaartarfiup naatsorsugai malittussaavaat, tamannalu nalimmassaanermik taaneqartarpoq.
Naalakkersuisut siunnersuummik tunuartitsigaluartut, aappaagumut taamatut naleqqussaasoqartussaavoq, tamanna aningaasanut inatsit aqqutigalugu taamaallaat pissaaq.
- 2019-imut aningaasanut inatsit assigalugu 2020-mut aningaasanut inatsisissatut siunnersuummi oqaasertaliussaqarpoq malunnik, oqaasertaliussat naapertorlugit utoqqalinersiat siusinaartumillu pensionisiat naleqqussarneqartarput, Naalakkersuisut tusagassiorfinnut nalunaaruteqarnerminni allapput.
Nalimmassaanermi procenti 1,3 procentiusussatut naatsorsorneqarsimavoq, taannalu atorlugu pensionisiat qaffanneqassapput .
Siunnersuummik tunuartitsinerup kinguneranik, pensionisianik qaffaasarnissaq ukiumiit ukiumut aningaasanut inatsit naapertorlugu aalajangiiffigineqartassapput.