Naalakkersuisut: Nerukkaatissanut qularnaveeqqusiissut qaffanneqassaaq

Savaatillit aningaasatigut ikiorserneqartussanngorput – tamannalu nukinginnarpoq, Mariane Paviasen (IA) isumaqarpoq.

Nunalerineq unammilligassaqarpoq.

Corona Ukrainemilu sorsunnerup kingunerisaannik naggorissaatit nerukkaatissallu akiisa qaffarujussuarnerinik kinguneqarput – nunalerinermilu tamanna malugineqarsinnaavoq. Tamanna tunngavigalugu Inatsisartut Aningaasaqarnermut Akileraartarnermullu Ataatsimiititaliaannut nerukkaatissanut qularnaveeqqusiissutip 2022-mi 3,5-iniit 5 millioner koruuninut qaffanneqarnissaannik inassuteqaammik nassiussisoqarpoq.

Mariane Paviasenip Inuit Ataqatigiinneersup 9. juni paragraf 37 naapertorlugu saavaatilinnik tunngaveqarluni apeqquteqarnerata kingorna, taama aalajangertoqarpoq.

Akit qaffattut

Mariane Paviasenip oqarnera naapertorlugu – savanut nerukkaatissat akii 50 procentit angullugit qaffariarsimapput, naggorissaatillu 100 procentit sinnerlugit qaffariarsimapput. Tamatumalu inuussutissarsiut tatisimavaa, savaatillit ilaatigut ukiumut nerukkaatissanik naammattunik qulakkeerinninnissamik ajornakusoortitsisinnaammata.

Savaateqarnerlu ingerlaannassappat maannangaaq ikiorsiisoqarnissaa pisariaqavissoq, politikeri isumaqarpoq.

Maannalu taamaaliortoqarnialerpoq.

Aningaasatigut ikiorsiissutit

Sooq Naalakkersuisut nerukkaatissanut qularnaveeqqusiissutip qaffanneqarnissaanut inassuteqarsimanersut, Nunalerinermut, Imminut Pilersornermut, Nukissiutinut Avatangiisinullu naalakkersuisup Kalistat Lundip (IA) allagaqarluni tunngavilersuivoq.

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmiit SPS nerukkaatissanut qularnaveeqquseeqqinnissamik pisariaqartitsineq pillugu ingerlaavartumik attaveqarfigineqartoq, taanna ilisimatitsivoq.

Tamannalu tunngavigalugu inassuteqaat Aningaasaqarnermut Akileraartarnermullu Ataatsimiititaliamut nassiunneqarpoq.

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmiit ineriartorneq malinnaaffigineqassaaq, aammalu pissutsit pillugit inuussutissarsiortunik attaveqarneq ingerlatiinnassallugu.

Powered by Labrador CMS