Naalakkersuisut: Narsarsuup heliportinngortinneqarnissaanut suli aalajangertoqanngilaq
Narsarsuup heliportinngortinneqarnissaanut naalakkersuinikkut aalajangertoqarsimanngitsoq, Naalakkersuisoq Karl Frederik Danielsen erseqqissaavoq. Suleqatigiissitalli suliassaani periarfissatut ilusiliaq taanna kisimi taaneqarsimavoq.
Narsarsuup heliportinngortinneqarnissaanut naalakkersuinikkut aalajangertoqarsimanera, attaveqaqatigiinnermut naalakkersuisup Karl Frederik Danielsenip (S) akerlilerpaa.
Taamaasilluni Sermitsiaq.AG-mi nunaqarfiit siunissaat pillugit suleqatigiissitat suliassaannik allaaserisarput illuatungilerpaa. Suleqatigiissitat suliassaanni allassimavoq:
- Suleqatigiissitap mittarfiup heliportimut allanngortinneqarnissaanut tamatuma nunaqarfimmut Narsarsuarmut kingunissaanik misissuinissaq naliliinissarlu suliassarilerpaa.
Periarfissanik ilusilianik allanik suleqatigiissitami allassimasoqanngilaq.
Tassanngaanniilli heliportiliortoqarsimaneranik aalajangertoqarsimassasumik inerniliineq ilumuunngitsoq, Karl Frederik Danielsen (S) tusagassiutinut nalunaarummini allappoq.
- Suleqatigiissitap maanna suliaq aallartippaa. Suliaq taanna Narsarsuup Mittarfiata siunissaa pillugu naalakkersuinikkut oqallinnermut aalajangiinermullu tunngaviliissaaq. Sermitsiami allassimasutut suli naalakkersuinikkut aalajangiisoqarsimanngitsoq erseqqissassallugu uannut pingaaruteqarpoq, Karl Frederik Danielsen (S) allappoq.
Periarfissatut ilusiliat pingasut
Nalunaarusiarli 'Narsarsuarmi Mittarfiup siunissaa pillugu periarfissatut ilusiliat pingasut' suleqatigiissitap sulineranut tunngaviliisuussasoq, tusagassiutinut nalunaarummi allassimavoq. Tamannali suleqatigiissitap suliassaani allassimanngilaq.
Periarfissatut ilusiliat pingasut nalunaarusiami taaneqarsimasut tassaapput:
- Narsarsuaq ullumikkutut mittarfittut atuinnassaaq, akunnittarfiussananili
- Narsarsuaq mittarfittut atuinnassaaq, mittarfilli 799 miiterinngorlugu naalineqassalluni
- Mittarfik heliportinngortinneqassaaq
Nalunaarusiaq naapertorlugu mittarfik ullumikkutut itsiinnassagaanni tamanna inuiaqatigiinnut 174 milliuunit koruuninik annaasaqaataaffiussaaq, mittarfillu 800 miiteritut takissuseqalersikkaanni tamanna 28 milliuunit koruuninik annaasaqaataaffiussalluni.
Mittarfik heliportinngortinneqassappat tamanna inuiaqatigiinnut 47 milliuunit koruuninik iluanaaruteqarfiussaaq.
Nalunaarusiami ima inerniliisoqarpoq:
- Kujataani angallannerup ilusiligaaneranut ataatsimoortumik aningaasaqarnikkut misissueqqissaarneq matuma siuliani allassimasoq aallaavigalugu, Qaqortumi 1500 meterimik mittarfittaqartumik nutaamik mittarfiliorneq aammalu Narsarsuarmi Mittarfiup qulimiguulinnut mittarfimmut annikillisinneqarnera, imminut akilersinnaanerpaasussaavoq.