Naalakkersuisut: Nannunik takusassarsiortitsilluni angallassisarnerit inerteqqutaajunnaassapput

Kujataani takornariartitsisartup takornariat nannunik takusassarsiortittalerusuppai, tamatumalu periarfissaalernissaa Naalakkersuisunit sulissutigineqarpoq. Naalakkersuisumit neriorsuutigineqarpoq nannut suli mianersuunneqassasut.

Nanoq, Isbjørn, sommeren 2014, Aappilattoq

Nanorsuit qaqortut Kalaallit Nunaanni takornariartitsisarnermut allatorluinnaq ikiuutaalersinnaapput. Naalakkersuisummi takornariartitsisartut periarfissinniarpaat nannunik takusassarsiornissamut neqerooruteqartalernissaannut.

Ullumikkut malittarisassat atuuttut malillugit nannut qanilleqqusaanatillu malersorneqaqqusaanngillat, tassa nanoq assersuutigalugu najugaqarfiup eqqaanut pisimanngippat imaluunniit piniarneqanngippat.

Malittarisassalli taakku maanna allanngorinneqarniarput. Naalakkersuit oktobarip 21-ani ataatsimiinnerminni tamanna aalajangersimavaat.

Aalisarnermut, Piniarnermut Nunalerinermullu Naalakkersuisoqarfiup Sermitsiaq.AG-mut ilisimatitsissutigaa, nannunik takusassarsiortitsilluni angallasisarnissaq inerteqqutaajunnaartinnagu nannut illersorneqarnissaat pillugu nalunaarutit marluk allanngortinneqassasut.

Malittarisassat allannguutaat ukiortaami inissinneqareersimassasut

Naalakkersuisut aalajangiussimavaat, nalunaarutit taakku marluk ukioq naatinnagu naammassillugit suliarineqareersimassasut.

Inuussutissarsiornermut Naalakkersuisoqarfik naapertorljugu suliaq aallartinneqareersimavoq, takornariartitsisartut arlallit nannunik takusassarsiortitsisarnissamik kissaateqarnerat pissutigalugu.

- Takornariartitsisartut ilaqarput nanoq tunngavigalugu tunisassianik ineriartortitserusuttunik. Soorunami tamanna paasisinnaavara. Nanoq uumasuuvoq ataqqinartoq aamma Kalaallit Nunaannut ilisarnaataasoq.

- Takornariartitsisartuvut pkkorissut uumasuutitsinnik kusanartorsuarmik niueruteqarsinnaalernissamut periarfissikkusuppavut, Inuussutissarsiornermut Naalakkersuisoq Jens-Frederik Nielsen (S) Sermitsiaq.AG-mut oqarpoq.

Naalakkersuisoq: Malittarisassaqassaaq

Malittarisassat maanna atuuttut nannut illersorniarlugit sanaajupput, Jens- Frederik Nilsenillu neriorsuutigaa, nannut suli mianerineqassasut:

- Soorunami piumasaqaatitalinnik malittarisassaliussaagut. Takornariat isumannaatsumik angallanneqarnissaannut piumasaqaateqarpugut, aamma uumasunik akornusersuivallaannginnginnissamut piumasaqaateqarpugut.

- Uannut pingaaruteqarpoq erseqqissaaffigissallugu, akisussaassuseqanngitsumik ingerlatsisoqannginnissaa, pingaartipparpullu takornariartitsisartunut malittarisassaqartitsinissarput, Jens-Frederik Nielsen oqarpoq.

Powered by Labrador CMS