Naalakkersuisut: Mittarfiliat pillugit ammanerusumik ingerlatsisoqassaaq
Naleraq IA-lu mittarfiliornerit pillugit naalakkersuisuusimasut matoqqavallaarnerarlugit isornartorsiuisarsimapput. Partiillu matoqqavallaartoqarnera allanngortinniarlugu maanna sulissuteqarput, mittarfiliornerillu tamanut ammanerusumik saqqummiuttalerniarlugit.
Inuit Ataqatigiit Nalerarlu illuatungiliuttuugallaramik mittarfiliornerit pillugit paasissutissiisoqartarnera naammaginngilluinnarsimavaat.
Mittarfiliornernut aningaasaliissutit nunap oqaluttuarisaaneran annersaapput. Mittarfiliornissamut katillugit 3,6 milliarder koruunit aningaasaliissutigineqarsimapput.
Ukioq manna siusinnerusukkut saqqummiunneqarpoq, Kalaallit Airportsip Nuummi Ilulissanilu mittarfissanut atugassanik immikkut 900 millioner koruuninik taarsigassarsinissaq sulissutigigaa, tassa missingersuutigineqarsimasunit 30 procentinik qaangiisussanngorluni. Peqatigitillugu kujataani mittarfissap qanoq akeqarsinnaanera piffissami sivisuumi eqqarsaasersuutigineqarsimavoq, tassani siullermik suliarinnittussarsiuussineq taamaatiinnarneqarsimavo, neqeroorutigineqartut akisuallaarnerat pissutigalugu.
Siulittaasoq ataatsimiititaliarlu ataatsimeeqatiserineqartut
Inuit Ataqatigiit Nalerarlu illuatungiliuttuunerminni nunami aningaasaliissuteqarnerit annersaat pillugu mattoqavallaartoqarnerarlugu naammagittaalliortarsimapput.
Taamaammat Attaveqatigiinnermut Naalakkersuisup Naaja Nathanielsenip aamma Nunamut Namminermut Naalakkersuisup Asii Chemnitz Narupip suliaq pillugu paasissutissat saqqummiuttarniarpaat.
- Mittarfiliat pillugit suliniut pillugu annerusumik ilisimasaqarnissamik paasinninnissamillu pisariaqartitsisoqarneranut paasinnilluarpugut. Taamaattumik pisariaqartumik tamat isiginnissuteqarnermik pilersitsiumalluta siunnerfilimmik sulivugut. Suliniutit pillugit killiffimmik pisumullu paasissutissiilluta ataatsimiisitsinissatsinnut partiini siulittaasut kiisalu Inatsisartut Aningaasaqarnermut Ataatsimiititaliaa aamma Sanaartornermut Ataatsimiititaliaa piffissami qaninnerusumi aggersaassummik nassinneqassapput, Naalakkersuisut taakku marluullutik allapput.
Innuttaasut paasissutissinneqarnerusassasut
Inatsisartut ilisimatinneqareeraangata innuttaasut ilisimatinneqartassapput.
- Tamatuma kinguninngua Inatsisartuni ilaasortat sinneri kiisalu nunatsinni innuttaasut paasissutissinneqassapput. Atortussatut saqqummiussanik tusagassiorfinnut nassitsissaagut, Naalakkersuisullu nittartagaasigut paasissutissanik pisariaqartunik aamma saqqummiissalluta. Sulineq tamanna Naalakkersuisooqatigiit ammasuunissamik, oqaloqatigiinnissamillu kissaateqarnerinut naapertuuppoq, oqalliseqatiginninnissarlu qilanaaralutigu, Naaja Nathanielsen Asii Chemnitz Narupilu allapput.
Naalakkersuisut taakku marluullutik naatsorsuutigaam Inatsisartut juunip qaammataata ingerlanerani paasissutissinneqassasut.