Naalakkersuisut: MIttarfiit pillugit aalajangernissamut tunngavissaqarluarpoq

Mittarfinnut inatsisissap aalajangernissaanut paasissutissat amigarnerinik illuatungiliuttut isornartorsiuinerat, Naalakkersuisut itigartitsissutigaat.

Inatsisartunut ilaasortat mittarfiit aaqqissuussaanerannut nutaamut annertuumik aalajangiinissaminnut paasisimasaqarluarput, Naalakkersuisut taama isumaqarput. Aningaasaqarnermut akileraartarnermullu ataatsimiititaliap isumaliutissiissutaanut akissuteqaammi tamanna atuarneqarsinnaavoq.

- Apeqqutit itisiliiviusussat, Inatsisartunut ilaasortanit § 37 naapertorlugu apeqqutitut imaluunniit inatsisissatut siunnersuutip matuma Ataatsimiititaliamit suliarineqarneranut atatillugu apeqqutitut ilusillit 200-nit amerlanerusut Naalakkersuisut tigusimavaat akissuteqarfigisimallugillu.

Mittarfissanut inatsisissaq ullumikkut Inatsisartuni oqaluuserineqassaaq.

- Apeqqutit pitsaasut attuumassuteqartullu Naalakkersuisut sapinngisamik tamakkiisumik akissuteqarfiginiarsarisarsimavaat. Apeqqutit ilaannut akissuteqarnermi, siunnersuummut ilaasimasinnaasut tamarmik qulaajaavigineqarnissaat qulakkeerniarlugu, avataaneersunik immikkut ilisimasalinnik ikiorteqartarsimavugut.

Illuatungiliuttut ugguarigaat

Illuatungiliuttut allatorluinnaq isumaqarput. Inuit Ataqatigiit aamma Suleqatigiissitsisut paasissutsissanik amigaateqarput, taamaattumillu inatsisissatut siunnersuut tapersersorsinnaanngilaat.

- Tamannarpiaq pissutigalugu Ataatsimiititaliami ikinnerussuteqartut misissueqqissaarnernik amerlanerusunik pisariaqartitsisoqartoq oqariartuutigimmassuk, Naalakkersuisut uggoraat. Isummersorneq soorunami Naalakkersuisut tusaatissatut tiguaat. Naalakkersuisut isumaqarput maannakkut tunngaviusut aalajangiinissamut pitsaalluinnartut, Naalakkersuisut akissuteqaamminni allapput.

- Maannakkut Kangerlussuaq Kalaallit Nunaanniit aammalu Kalaallit Nunaannut isaavittut atorlugu angallasseriaatsimi ilaasorpassuit piffissarujussuarmik aningaasanillu atuisarput, tassami taakkua tamatuma kingorna ornigassaminnut apuunnissaminnut nunatta iluani angallannermik atuisussaasarmata.

- Siunnersuutip atuutilernerani ilaasut amerlanerpaartaasa minnerpaamik sivikinnerusumik angalasalernissaq naatsorsuutigisinnaassavaat – aammalu ullumikkornit akigititat appasinnerussasut.

Danskit iliuuseqarnerat nuannaarutigigaat

Lars Løkke Rasmussen aamma Kim Kielsen septembarimi danskit naalagaaffiat mittarfinnut aningaasaliinissaat pillugu isumaqatigiissusiormata, ilisimaneqartutut eqqissiviilliornermik kinguneqarpoq – naalakkersuisoqatigiillu avissaarput. Aningaasaqarnermu ataatsimiititaliap Kim Kielsen isumasioqatigiinnissamut qaaqquaa, tassungalu agginngilaq. Tamannalu aamma isornartorsiorneqarpoq, Inatsisartullu siulittaasuannut maalaaruteqartoqarluni. Naalakkersuisut isumaqatigiissut tamarmik pitsaasutut isigaat, tassanilu aamma tunngavigineqartoq ajunnginnerarlugu.

- Siullermeerereernerup kingorna nuannersumik pisoqarpoq, Nuummi aamma Ilulissani mittarfinnik aningaasalersueqataanissamik naalagaaffiup kissaateqarnerani danskit naalagaaffianut isumaqatigiissuteqartoqarluni. Naalagaaffik suliassami annertoorsuarnik millioninik pingasunik kisitsisitalinnik aningaasartalinnik akiliuteqarumavoq. Aningaasaqarnermut Siunnersuisoqatigiit isumaqarput suliassaq maannakkut patajaannerujussuanngortoq, tassami naalagaaffiup aningaasaleeqataaneratigut aningaasat Kalaallit Airports A/S-ip aningaaserivinni kreditinstitut-inilu taarsigassarsiarisassai malunnaatilimmik annikillisimmagit.

USA-p soqutiginninnera

Tamatuma kingorna amerikamiut mittarfinnut aningaasaleeqataanissamut isumaliutersuuteqarlutik aamma qanoq pilersaarnerminnik nalunaaruteqarput. Aviisip Sermitsiap tamatuma kingorna saqqummiuppaa, USA Ilulissani 2.800 meterisut takissusilimmik mittarfimmut tapeeqataanissaminut soqutiginnittoq. Amerikamiut qanorpiaq pilersaaruteqarnerannik Naalakkersuisut suli paasissutissanik pissarsisimannginnertik attatiinnarpaat.

- Amerikamiut illersornissaqarfiat Kalaallit Nunaanni aningaasaliinissamik soqutiginnilluni oqaaseqarpoq, kisianni aalajangersimasunik suli pisoqanngilaq. Suliassami matumani, innuttaasunut attaveqaqatigiinnermi sanaartornissaq, Naalakkersuisut suliassaanni pingaarnersaavoq. Ullut arlaanni pisariaqalissappat Amerikamiut aningaasaliisussanngorsinnaanerat pisussanngussagaluarpat politikkikkut oqallisigineqartussaassaaq. Nunatsinni attaveqaqatigiinnermik aaqqissuussinitsinni, amerikamiut peqataanissaat aalajangiisuunngilaq.

Powered by Labrador CMS