Naalakkersuisut: Meeqqat ilaatinneqarnerulissapput

Meeqqat pisinnaatitaaffii pillugit Naalagaaffiit Peqatigiit isumaqatigiissutaata malinneqarnera Naalakkersuisut qaffatsikkusuppaat.

Naalakkersuisut iliuusissatut pilersaarummi suliniutinik 24-nik suliaqarnerisa kingorna tamanna erserpoq, taakku suliassaqarfiit arlallit akimorlugit meeqqat isumaat ilaatinneqarnerulissapput, ulluunerani paaqqinnittarfiit, atuarfiit aamma peqqinnissaqarfik allallu ilanngullugit.

Pitsaasumik toqqissisimanartumillu peroriartorneq inuusuttuunissamut inersimasuunissamullu pitsaasumik tunngaviliisartoq, meeqqanut, inuusuttunut, ilaqutariinnut peqqissutsimullu naalakkersuisoq, Mimi Karlsen isumaqarpoq.

- Meeqqat tamarmik tamatta toqqissisimanartumik peroriartortinnissaannik ikiortariaqarpavut. Sumiluunniit meeqqat peroriartorunik, kikkulluunniit angajoqqaarigunikkit, inuunermut pisariaqartitaasut suulluunniit pigigaluarunikkit, taava pitsaasumik toqqissisimanartumillu peroriartortariaqarput, naalakkersuisoq tusagassiuutinut nalunaarummi taama oqaaseqarpoq.

Iliuusissatut pilersaarut

Iliuusissatut pilersaarummi nutaami suliniutit 24-it nassuiarneqarput, qulequttallu tallimat pineqarput:

• Meeqqat isumaat.
• Ilaqutariit, toqqissimaneq sinaakkutillu.
• Nakuusertarnermut, innarliinermut atornerluinermullu illersuineq.
• Ilinniartitaaneq ineriartornerlu.
• Peqqinneq inuuniarnerlu pitsaasoq ineriartornermik qulakkerinnittoq.
• Meeqqat isumaat nukittorsaavigineqassaaq

Suliniut siulleq atorlugu naalakkersuisoqarfiit assigiinngitsut aqutsisoqarfiillu akornanni meeqqat ilaatinneqartarnissaannut ukkassineq periutsitut atorlugu patajaallisinniarpaat.

Pingaarnersiuinerni aaqqiissutinilu namminerminnut tunngasunut, peqatigisaanillu pisariaqartitaannik naapertuuttunut meeqqat ilaatinneqarlutik misigissagaat anguniagaavoq. Meeqqat isiginninnerat suliarineqassaaq, tassaniissallutik meeqqanut attuumassuteqartuni Naalakkersuisut suliaanni tamani meeqqat ilanngutitinneqarnerinut periusissatigut anguniakkanik imaqartussaq, iliuusissatut pilersaarummi tamanna oqaatigineqarpoq: Suliniutinut siunnerfileeqataassapput.

Meeqqat Illersuisoqarfiata MIO-p Nakuusamilu MI, meeqqat taasinerat qanigisani inuiaqatigiinnilu nalinginnaasumi nukittorsarneqartariaqartoq tikkuarpaat.

Suliniutip aappaata anguniagaraa inersimasut meeqqat oqaaserisaannut tusarnaassasut isumaqarpoq. Tassani meeqqap qanittumi attavii, nunaqqatigiinni inersimasut, kommunimi atorfillit politikerillu kiisalu nuna tamakkerlugu atorfillit politikerillu pineqarput.

Meeqqat inuunerissut

Taamaattumik Nakuusami Meeqqat Isummersorfiat patajaallisarneqassaaq. Meeqqattaaq Naalakkersuisut naalakkersuisoqarfiillu akimorlugit suliani paasitinneqarlutillu ilaatinneqassapput.

- Meeqqat inuunerminni suut initoorujussuunersut nalunngilaat. Tamassuma paasiniarluarnissaanut pikkorinnerunissarput anguniagarivarput, Naalakkersuisoq Mimi Karlsen oqarpoq.

Iliuusissatut pilersaarut ilaatigut Meeqqat Illersuisoqarfiata MIO-p saqqummersitaanit Naalagaaffiit Peqatigiit Meeqqat Pisinnaatitaaffii pillugit Isumaqatigiissutaannik Kalaallit Nunaanni piviusunngortitsiniarnissamut nuna tamakkerlugu iliuusissamik pilersaarutissamut meeqqat inassuteqaataat-nit isumassarsiorfigineqarpoq, taanna 2015-2018-imi sineriak tamakkerlugu apeqqutit immersugassallit atorlugit meeqqanik 295-inik misissuinermit tunuliaqutaqarluni sananeqarsimavoq.

Iliuusissatut pilersaarut tamakkiisoq uani atuarsinnaavat.