Naalakkersuisut: Meeqqat ikinnerusut 2030-mi angerlarsimaffiup avataanut inissinneqartalissasut

Meeqqat ikinnerusut angerlarsimaffiup avataanut inissinneqartalissapput. Qanorli ikilitigissanersut, naalakkersuisut ersarissumik anguniakkamik suli taasinngillat.

Meeqqat 750-it missaat angajoqqaaminni maanna najugaqanngillat. 400-t missaat angajoqqaarsiani najugaqarput. Sinnerilu ulloq unnuarlu angerlarsimaffinni najugaqarlutik. Tassa nunatsinni meeqqat 0-17-inik ukiullit 4,5 procentii angerlarsimaffiup avataanut inissinneqarsimapput.

Taama inissisimasut ikilisariaqarput, meeqqanut, inuusuttunut ilaqutariinnullu naalakkersuisoq, Mimi Karlsen (IA), ilaqutariinni pitsaaliuinermik suliaqarnermut iliuusissatut pilersaarut 2023-2030 saqqummiukkamiuk taama oqarpoq.

Iliuusissatut pilersaarummili aalajangerneqanngilaq meeqqat qanoq amerlatigisut 2030-mi angerlarsimaffiup avataanut inissinneqartassanersut.

- Kisitsisilerlugu anguniakkamik taasinngilagut kisitsisit pigisagut naammannginnamik. Kisitsisit kommuninit pisassagut katersornerini anguniagassat ersarinnerulerumaarput, naalakkersuisoq, Mimi Karlsen tusagassiorfinnik katersortitsinermi oqarpoq.

Pitsaaliuineq salliutillugu

Meeqqalli angajoqqaaminni peroriartornissaat anguniarlugu naalakkersuisut ataasiakkaanik ersarissunik suliniutissaqalereerput.

Meeqqat nunatsinni peroriartornerat pitsaanerulissaat, angerlarsimaffiullu avataanut inissinneqartut ikilisarneqassapput. Angajoqqaat tapersersorneratigut sullinneratigullu tamanna anguneqassaaq.

Mimi Karlsenip suliniutit ersarissut pingasut taavai - taakku kommunit peqatigalugit ukiuni tullerni aallartinneqassapput.

Suliniutit ukuupput:

  • Ilaqutariinni siunnersortit angalasartut
  • Ilaqutariit atugarliortunut inissat
  • Angajoqqaarsiat aallunneqarnerussapput

- Ilaqutariit illui isumaginnittoqarfiillu qanimut ataqatigiissumillu suleqatigiinnerussapput, taamaasillutik ilaqutariit tapersersorneqarnerat sullinneqarnerallu ataqatigiissarneqarnerussalluni, meeqqat angerlarsimaffiup avataanut inissinneqartarnerat pitsaaliorneqarluni, Mimi Karlsen (IA) oqarpoq.

Kommunit suleqatigineqassapput

Angajoqqaarsiaasartut aamma aallunneqarnerulissapput. Meeqqammi angerlarsimaffiup avataanut inissinneqassappata, tamanna angajoqqaarsianuunerusoq pissasoq anguniarneqarpoq.

- Kommunit suleqatigalugit angajoqqaarsianik atulersitsineq, angajoqqaarsianillu pikkorissaaneq ingerlanneqartassaaq. Aamma angajoqqaarsiat oqilisarneqartarnissaat sulissutigineqassaaq, oqarpoq.

Meeqqanut, inuusuttunut ilaqutariinnullu naalakkersuisoq, Mimi Karlsen Sermitsiaq.AG-mut nassuiaavoq pitsaaliuinermik suliaqarneq iliuusissatut pilersaarummi taaneqartoq kommunit ataasiakkaarlugit ingerlanneqassasoq. Sulianik aallartitsinermi kommunit tulliinut saannermi, misilittakkat iluatsittut aamma atorneqartassapput. Atuutsilersitsineq ataavartumik nalilersorneqassaaq.

Powered by Labrador CMS