Naalakkersuisut: Kinguaassiutitigut kannguttaatsuliorfigineqarsimasunut nuna tamakkerlugu katsorsaavissamut tapersiinngilagut
Meeqqanut inuusuttunullu kinguaassiutitigut atornerlunneqartartunut ajornartorsiut nuna tamakkerlugu katsorsaavimmik pilersitsinikkut qaangernavianngilagut. Tamanna misilinneqareersimavoq, Martha Abelsen tikkuaavoq.
Atoqatiinnermi pissutsinik ilinniagallip Ulrikka Holmip, Nunatsinni meeqqanut inuusuttunullu kinguaassiutimikkut atornerlunneqarsimasunut qitiusumik katsorsaaveqarnissaa, AG-mi sapaatip- akunnerani kingullermi siunnersuutigaa. Peqqissutsimulli isumaginninnermullu naalakkersuisoq siunnersuummut isumaqataanngilaq.
AG taama allappoq.
Meeqqat illuanni “Saaffik” ukiut arfineq-marluk matuma siorna 2011-mi pilersinneqarmat tamanna misilinneqareersimagaluarpoq, taannami tassaammat meeqqanut inuusuttunullu kinguaassiutimikkut atornerlunneqarsimasunut nuna tamakkerlugu sullissiviusoq, Martha Abelsen oqarpoq.
- Suliniutitut misilinneqareersuni misilittakkat takutippaat, manna aqqutissaanngitsoq eqqortoq, Martha Abelsen AG-mut allakkamini nassiussamini allappoq.
Martha Abelsenip tikkuarpaa “Saaffik” meeqqanit Nuummi najugaqartunit annerusumik iluaqutigineqarsimasoq illoqarfiillu pingaarnersaata avataanni najugaqartunit iluaqutigineqarsimarpiarani. Taamaammat maanna meeqqanut inuusuttunullu kinguaassiutitigut atornerlunneqarsimasunut sullissiviujunnaarpoq.
Martha Abelsenip atoqatigiinnermi pissutsinik ilisimasaliup siunnersuutaa sooq tapersinngikkaa, AG-mi nutaami atuarsinnaavat.