Naalakkersuisut: Kinguaassiutitigut atornerluinerit akiorniarlugit milliuunilikkaanik aningaasaliisoq
Meeqqat kinguaassiutitigut atornerlunneqartarnerannut akiuiniarnermi suliniutinut atugassanik, Danmark 80 milliuunit koruuninik ukiuni sisamani tullerni atorneqartussanik immikkoortitsivoq. Naalakkersuisut maanna ilisimatitsivoq suliniummut 7,5 milliuunit koruunit tungaannut ukiumut aamma aningaasaliisassallutik.
Danmarkip ikiuutitut aningaasat tunniussai ilallugit Kalaallit Nunaat aningaasaleeqataanissaminut piareerpoq. Naalakkersuisut aningaasanik immikkoortitsipput, taakkulu Tasiilami Kalaallit Nunaatalu sinnerani isumaginninnermut suliassaqarfimmi suliniutit patajaallisarneqarnissaannut atatillugu ukiumut 7,5 milliuunit koruunit angusinnaavat.
Isumaginninnermut naalakkersuisoq Martha Abelsen taama ilisimatitsivoq.
- Aningaasanut inatsisissatut siunnersuut manna aqqutigalugu suliniummut akisussaassusermik tigusinerput soorunalumi aamma ilanngussinissatsinnut pisussaaffeqarnerput takutikkatsigu nuannaarutigeqaara. Taamaammat Inatsisartut 2020-imut aningaasanut inatsisissaq akuersissutigissagaat soorunami assorsuaq neriuutigaara, taamaalilluta meeqqat ikiorniarlugit pingaarutilimmik suliassaq sukkanerpaamik aallartinniassagatsigu, Naalakkersuisoq Martha Abelsen oqarpoq.
Danmarkip katillugit 80 milliuunit koruunit Kalaallit Nunaanni meeqqanut suliniutit atorneqarnissannut immikkoortissallugit, Folketingep ullumi aalajangerpaa. Aningaasat isumaginninnermut tunngatillugu isumaqatiginninniarnerni immikkoortinneqarput. Danskit isumaginninnermut ministeriat Astrid Krag (Soc) oktoberimili nalunaaruteqarpoq kissaatigineqartoq kalaallit meerartaannut immikkut ikiorsiissutinut atortussanik ukiuni sisamani tullerni katillugit 80 milliuunit koruuninik aningaasaliisoqassasoq.
Qulaajaaneq
Suleqatigiissitaq maanna suliaqarpoq, meeqqat kinguaassiutitigut atornerlunneqarsimasut qanoq ikiorneqarnissaat pillugu qulaajaasunik.
- Pissutsit meeqqamut pingaarutillit
- Pissutsit kannguttaatsuliortumut tunngasut
- Atituumik pitsaaliuinermik suliaqarneq
Suleqatigiissitaq siullermik nalunaaruteqassaaq decemberimi. Nalunaarusiarlu naammassisaq danskit naalakkersuisuinut nunatsinnilu naalakkersuisunut 2020-mi ukiup affaani siullermi tunniunneqassalluni.