Naalakkersuisut: Kia "kalaaliuneranik" paasinninnissaq initusariaqarpoq
Kina kalaaliunersoq paasiuminaassinnaavoq, ikinnerussuteqarlutilli Kalaalilli Nunaanni najugaqartut pillugit paasinninnissaq inituujusariaqarpoq, Naalakkersuisut taamatut isumaqarput.
Partii Naleqqamit kina kalaaliunersoq aamma kikkut kalaallinut inuiaqatigiinnut attuumassuteqarnersut oqallissaarutigineqarsimavoq.
Partiiip apeqquteqaat aallaavialugu oqallinnissaq Inatsisartut oqaluuserisassaannut ilanngutsissimavaa, Naalakkersuisullu taamaammat Partii Naleqqap oqallissaarutaanut akissuteqarsimallutik.
AAMMA ATUARUK: Oqallinneq: Kina kalaaliuva
Aningaasaqarnermut naalakkersuisoq akissuteqarnermini allappoq, kia kalaaliuneranik, kalaallillu kinaassusiata suuneranik aalajangersaassagutta suut aallaavittut atornissaannik aalajangersaanissaq ajornaatsuunngiltsoq.
Nassuiaaserneqarsimanngitsoq
Ilaatigut Namminersorlutik Oqartussat pillugit inatsimmi akuersaarneqarpoq, kalaallit inuiaat kikkut kalaaliunerannik nassuiaasiunngikkaluarlutik namminneq aalajangiisinnaatitaanerat:
- Tamannarpiarlu patsisigalugu kia kalaaliuneranik paasinninnissaq inituujullunilu inuiaqatigiitsinni atorneqartutut kulturikkut, oqaatitsigut ataatsimooqatigiinnermillu isiginninnartuussasoq Naalakkersuisut pingaartippaat.
- Tulliullugu paasinninnermi aamma ikinnerussutillit maani najugaqartut, kinguaariinnilu arlalinni maani najugaqarsimasut aamma qissiminneqartariaqarput.
Tunngaviusumik inatsisissaq pillugu isumalioqatigiissitaq aamma kikkut kalaaliunerannik nassuiaasiortussaasoq
Tamatuma saniatigut Qujaukitsup innersuussutigaa, Tunngaviusumik inatsisissaq pillugu Isumalioqatigiissitap apeqqut tamanna akissuteqarfigisussaagaa. Isumalioqatigiissitaq innuttaasut peqataatilllugit akissutissarsippat, Inatsisartut isumalioqatigiissitap isumaliutissiissutaa suliarilerunikku apeqqut isummerfigissavaat.
Naalakkersuisut taamaalillutik Partii Naleqqameersup Pele Brobergip siunnersuutaanut sanilliullugu initunerusumik nassuiaasiorput:
- Angajoqqaavit arlaat nunatsinni inunngorsimappat aammalu taakkua angajoqqaavini ataaseq nunatsinni inunngorsimappat taava ilimagissavat ILLIT aamma kalaaliugavit, Pele Broberg oqallissaarummini allappoq.
Oqallissaarutip Inatsisartuni marlunngorpat oqaluuserineqarnissaa pilersaarutaagaluarpoq, Inatsisartulli ataasinngormat nalunaarutigaa, oqallissaarut februaarip qaammataani ukiukkut ataatsimiinnissamut kinguartinneqarsimasoq.