Naalakkersuisut: Kalaallit aalisagaataannik danskit iluanaarutaat ilisimaneqanngillat
Kalaallit Nunaata aalisagaataasa Danmarkimut nassiunneqartut, tassanngaanniillu avammut tunineqartartut qanoq iluanaarutaasarnerat naatsorsorneqarsinnaanngilaq. Paasiniaraanni ingerlatseqatigiiffinnit paasissutissat Naalakkersuisut pissarsiarisinnaanngisaat pissarsiarineqartariaqarput, aningaasaqarnermut naalakkersuisoq oqarpoq.
Aalisakkat Kalaallit Nunaanni pisarineqartut Danmarkimut tunineqartartut, tassanngaanniillu nunanut allanut tunineqartartut, Danmarkip danskillu suliffeqarfiisa qanoq iluanaaruteqarfigisarneraat paasiniarlugu, IA-meersoq Mariane Paviasen Naalakkersuisunut paasiniaavoq.
Aalisakkat Kalaallit Nunaanni pisarineqartut 80-nit 90 procentiinut amerlassuseqartut Danmarkimut tunineqartartut, Naalakkersuisut ilisimatitsipput, taakkulu amerlanerpaartaat nunanut allanut tuneqqinneqartartut.
Kisianni Danmarkimi nalitunerulersitsinerup annertussusaa pillugu paasissutissaqarpianngilaq. Assersuutigalugu aalisakkat qanoq amerlatigisut Danmarkimi suliareqqinneqartarnersut, Naalakkersuisut paasissutissaateqanngillat.
Nalitunerulersitsinerup agguataarneqarnera nalunartoq
Aalisakkat Danmarkimit tuneqqinneqaraangamik qanoq naleqarnerulertarneri naatsorsorniaraanni, ingerlatseqatigiiffinnit paasissutissat erseqqissut pisariaqartinneqarput, taakku Naalakkersuisut pissarsiarisinnaanngilaat.
- Nunani allani suliffeqarfiit paasissutissanik tunniussinissamik piumaffigineqarsinnaanngimmata, matumani suliffeqarfiit nunanit allaneersut nammineq kajumissutsiminnik paasissutissanik tunniussiumanerat apeqqutaassaaq. Tamannalu qularnartupilussuuvoq.
- Paasissutissanik amigaateqarnerup nassataanik nunatsinnik nunattalu avataani nalitunerulersitsinerup agguataarsimanerpiaa, ingerlatseqatigiiffiit nunani allaneersut nalitusiartortitsinerannik ilanngussiviusoq naatsorsorneqarsinnaanngilaq, aningaasaqarnermut naalakkersuisoq, Naaja H. Nathanielsen (IA) Mariane Paviasenimut akissummini allappoq.
Ilaatigut qalerallit nunatsinni pisat Danmarkimit tunineqaraangata kiilumut qanoq akeqartinneqartarnersut, Mariane Paviasenip paaserusuppaa, Naalakkersuisulli taakku kisitsit piginngilaat.