Naalakkersuisut: Ivaaqqami pisimasoq tunngavigalugu piumasaqaatit nutaat akiligassanik pilersitsisinnaasut
Innarluutilinnut atatillugu sulisoqarnermut piumasaqaatit sukannernerulersinneqarsimasut nunatsinni ulloq unnuarlu angerlarsimaffit aningaasanik amerlanernik pisariaqartitsilernerannik kinguneqarsinnaapput.
Qaqortumi paaqqinniffimmi Ivaaqqami suliaq tunngavigalugu naalakkersuisoq naapertorlugu inunnut innarluutilinnut atatillugu sulisoqarnikkut suleriaatsini arlalinni sukaterisoqarsimavoq.
Atassutip siulittaasua Aqqalu Jerimiassen piumasaqaatit nutaat aningaasaqarnikkut kingunerisassaat pillugit Naalakkersuisunut apeqquteqaateqarpoq.
Meeqqanut, Inuusuttunut Ilaqutariinnullu Naalakkersuisoq, Mimi Karlsen (IA), akissutimini paasissutissiivoq, piumasaqaatit tigussaasut marluk sukateriffigineqarsimasut, taakkualu aningaasaqarnikkut kinguneqartussatut ilimagineqartut.
Piumasaqaatit tassaapput, paaqqinniffinni unnuami pigaartut minnerpaamik marluunissaat, aamma tikeraarluni angalanerni meeraq sulisumik ingiaqateqartillugu angalaneq unnuiffiusussaagaangat tamatigut ikinnerpaamik marlunnik ingiaqateqartassasoq.
Allannguutit kommuninut isumaqatigiinniutigineqassasut
Naalakkersuisoq oqaluttuarpoq, piumasaqaatit sukaterneqartut kingunerisaannik paaqqinniffinni akigititat allanngortinneqassanersut naatsorsuisoqarumaartoq:
- Qaammatit tulliuttut piumasaqaatit nutaat misilittagaqarfiulereerpata, ulloq unnuarlu paaqqinnittarfinni aamma ulloq unnuarlu neqeroorutini akiliutaasartut allanngornissaat siunertaralugu naatsorsuisoqarumaarpoq.
- Akiliutaasartut allanngortinnissaat ataatsimoortumik tapiissutit pillugit isumaqatigiissummut kommunit isumaqatigiinniarfigineqassapput. Tamassuma pinissaa qaqugu pissanersoq suli isumaqatigiissutaanngilaq, Mimi Karlsen allappoq.
Aqqalu Jerimiassenip aamma ujartuinermini paasiniarpaa, piumasaqaatit nutaat eqquutsinneqassappata Naalakkersuisut sulisussanik nutaanik inulerisunillu qanoq pissarsiniassanersut.
Allagartartaassutaasumik ilinniagaq nutaaq
Tamatumunnga Mimi Karlsen akissuteqarpoq, lsumaginninnermut Aqutsisoqarfiup ulloq unnuarlu paaqqinnittarfiit aamma ulloq unnuarlu neqeroorutit suliffeqarfittut ingerlalluarnissaat pilerinarnissaallu ukkatarigaat, taamaattumillu ilaatigut pisortat aqutsinissamut pikkorissarnissaanut neqeroorfigineqartartut. Tamatuma saniatigut Naalakkersuisut maannakkut sulisorisat ilinniarsimanngitsut piginnaasaasa qaffassarnissaat anguniagarivaat.
Mimi Karlsen naapertorlugu Naalakkersuisut aamma pikkorissaanerit saniatigut Perorsaanermik Ilinniarfimmi allagartartaassutaasussamik immikkut perorsaanermut ilinniakkamik pilersitsinissamut aningaasanik immikkoortitsisimapput, ilinniartussanillu tigusinissa siulliup septembarimi 2023-mi pinissaa ilimagineqarluni.
Ivaaqqami suliami pineqarpoq arnaq annertuumik innarluutilik, ilimagineqanngilluinnarsimasumik meerartaartoq. Arnaq oqaasiliunngilaq, angullu 62-inik arnamik pinngitsaaliilluni atoqatiginnissimanerminik nassuerutiginnissimavoq.