Naalakkersuisut: Inuiaqatigiinni nakuusertarneq unitsissavarput

Ilaqutariinni nakuusertarnerup akiorniarneqarneranut iliuusissatut pilersaarut nutaaq naammassineqangajalerpoq. Naalakkersuisut meeqqanut nakuusertarneq akiorniarlugu aamma meeqqat tamarmik toqqissisimanartumik angerlarsimaffeqarnissaat qulakkeerniarlugu suliniuteqarneruniarput.

Nunami nakuusertoqartarnera annikillisinniarlugu Naalakkersuisut tigussaasumik iliuuseqarnissamut piareersimapput.

Alliaq nakuusernermullu iliuusissatut pilersaarut nutaaq nakuusernermik akiuiniarnermi qitiupput. Meeqqanut, Inuusuttunut Ilaqutariinnullu Naalakkersuisup Mimi Karlsenip aamma Naligiissitaanermut Naalakkersuisup Naaja Nathanielsenip, meeqqanut inuusuttunullu atugarliortunut ilaqutariinni nakuusernermik eqqugaasuni peroriartortunut iliuuseqarneq annertusiniarpaat.

- Nakuusertarneq nungutissavarput, taamaammat inuit nakuusertartut allatut pissuseqalissapput. Qanoq pissusilersortarnerup allanngortinniarnera inunnut ataasiakkaanut ilungersunarsinnaavoq, qamanerisami taartoqarnera akuerisussaagami. Qaniginerpaasalli pisariaqartippaat, Meeqqanut, Inuusuttunut Ilaqutariinnullu Naalakkersuisoq Mimi Karlsen ilaqutariinnut angajoqqaanullu tamanut oqariartuuteqarpoq. Tamatuma saniatigut Kamassaqarnermik nakuusertarnermilluunniit ajornartorsiuteqaraanni akeqanngitsumik nuna tamakkerlugu neqeroorummut 'Alliaq'-mut attaveqarnissamik Mimi Karlsen kajumissaarivoq.

Nakuusertoqarsimaneranik nalunaarutiginnittartut amerliartortut

Politiit 2020-mi nakuusertoqarsimaneranik nalunaarutinik katillugit 1.394-inik tigusaqarsimapput, 2018-imi nalunaarutigineqartut 701-iusimapput - tassa nalunaarutigineqarsimasut ukiut marluk ingerlaneranni marloriaatingajaannik amerlisimallutik.

Tamanna Naalakkersuisut taakku marluullutik ernunamartoqartippaat. Taamaammat iliuusissatut pilersaarutissami susassaqartut tamarmik ilaatinneqassapput aamma pilersaarut Meeqqanut, Inuusuttunut Ilaqutariinnullu Naalakkersuisoqarfimmi atuuttuartussatut anguniagaavoq.

- 'Angajoqqaat meeqqanik sumiginnaasarnerat akiorniarlugu nuna tamakkerlugu iliuusissanut pilersaarut 2020-2030' suliniummi aallaavigineqarpoq. Kalaallit Nunaanni meeqqat inuusuttullu amerlanerusut toqqissisimasumik atugassaqarlutik peroriartorsinnaaqqullugit qanigisaasuni nakuusernerup pitsaaliorneqarnissaanut Naalakkersuisut siunnerfilimmik siunissamullu ungasinnerusumut sulinissaannik taanna qulakkeerinnissaaq.

Iliuusissatut pilersaarutit tarnikkut timikkullu nakuusernermut kiisalu kannguttaatsuliortumik pissusilersornernut sunulluunniit sammisunik iliuusissanik ilaatigut imaqassaaq, Naalakkersuisut tusagassiorfinnut nalunaaruteqarnermi ilisimatitsipput.

Powered by Labrador CMS