Naalakkersuisut: Inatsimmi amigaataasoq ukiortaamiit iluarsiiffigineqassaaq

Innarluutillit illersuisuata angalanerminit siullermeerluni nalunaarusiamini politikkerit kaammattorpai, inuit innarluutillit 60-inik ukioqalereersimasut pillugit inatsimmi amigaataasoq aaqqiiffigeqqullugu.

Inatsisartunili politikkerit ajornartorsiummik iluarseereersimasut paasinarsiavoq.

Torersumik pissusilersornissaq pillugu

Naalakkersuisut tusagassiorfinnut nalunaaruteqarnerminni ilisimatitsissutigaat:

- Inuit innarluutillit tapersersorneqarnissaannut inatsit nutaaq malillugu innuttaasut innarluutillit – qanorluunniit ukioqaraluarunik – inatsit malillugu tapersersorneqarnissaq periarfissarimmassuk torersumik pissusilersornissaq pillugu erseqqissarneqassaaq.

Nangillugulu:

Qanorluunniit ukioqaraluaraanni…

- ”Inatsisartut inatsisaat manna, ukiut apeqqutaatinnagit, inunnut innarluutilinnut Kalaallit Nunaanni najugaqartunut, atuuppoq.” (Inuit innarluutillit tapersersorneqarnissaannut Inatsisartut inatsisaat nr. 13 af 12. juni 2019-imeersoq, §6), Naalakkersuisut ilisimatitsipput.

Inatsit 2019-imi juunip aqqaneq-aappaanni Inatsisartunit akuerineqarpoq 2020-milu januaarip aallaqqaataani atuutilissalluni.