Naalakkersuisut: Ataatsimiititaliap nunap aningaasaqarnera ulorianartorsiortippaa
Naalakkersuisut Inatsisartunut kaammattuutigaat, Aalisarnermut, Piniarnermut Nunalerinermullu Ataatsimiititaliap uumasunut nakorsaqarnermut inussutissalerinermullu oqartussaaffimmik aappaagu ukiakkut katersuunnermi angerlaasseqqusinerat itigartitsissutigissagaat.
Naalakkesuisut tupassutigisimavaat, Aalisarnermut, Piniarnermut Nunalerinermullu Ataatsimiititaliaq isumaqatigiittoq, uumasunut nakorsaqarnermut inuussutissalerinermullu oqartussaaffimmik ukioq ataaseq qaangiuppat angerlaassinissamik tallimanngormat piumasaqarmat. Ataatsimiititaliaq isumaqarpoq, oqartussaaffiup angerlaanneqarnerani kinguneqaataasussat naammattumik ilisimaneqareersut.
Kinguneqaataasussat annertuut
- Inatsisartut suliassaqarfiup tamakkiisumik tiguneqarnissaa pillugu siunnersuutaasoq akuerissagaluarpassuk ilisimasaqassusermik tunngaveqarnavianngilaq, Kalaallit Nunaatalu inuussutissanik aalisakkannillu avammut niuerutigisartagaanut sakkortoorujussuarmik kingunerluutaasinnaasuuvoq, tamannalu nunatta aningaasaqarneranut aamma sakkortoorujussuarmik kalluaassalluni, Aaliasarnermut, Piniarnermut Nunalerinermullu Naalakkersuisoq Jens Immanuelsen ataatsimiititaliap isumaliutissiissutaanut akissuteqarami taamatut allappoq. Jens Immanuelsenip akissuteqaat Inatsisartuni ullumi aalajangiiffigisassatut siunnersuutip aappassaaneerlugu suliarineqarnerani saqqummiunniarpaa.
- Inuussutissalerinermut Uumasunullu Nakorsaqarfiup akisussaaffigineqarneranik tamakkiisumik angerlaassineq inatsisinik aamma oqartussaaffeqarnermi aaqqissuussinermik allannguuteqartitsiinnarnavianngilaq, aamma ineriartortitsinissamut piginnaasanillu ilinniagaqarsimasunik pissarsiortorniarnissaq pineqarlutik tassunga ilanngullugit inuit atorfeqartitaasut aamma aningaasatigut pisariaqartitsinerit, inuit piginnaasallu ullumikkut pigineqanngitsut, Jens Immanuelsen nassuiaavoq.
Allannguutissatut siunnersuut nutaaq
Ataatsimiititalialli oqartussaaffinnik sukkanerusumik angerlaassisoqarnissaanik kissaateqarnera Jens Immanuelsenip naapinniarsarivaa.
Naalakkersuisummi aalajangiiffigisassatut siunnersuummut allanngutissatut siunnersuuteqarput, tassani inuussutissalerinermut aamma uumasut nakorsaqarnerannut suliassaqarfiup tamakkiisumik tiguneqarnissaa pillugu Naalakkersuisut nassuiaasioqqullugit peqquneqarput.
Nassuiaat ”suliassaqarfiup tigujartuaarneqarnissaanut pilersaarusiamik siunnersuuteqartumik ilanngussisoqassaaq naalagaaffimmit akisussaaffinnik tigusinissanit allanut ilanngullugu imaqassaaq”. Oqaaseqatigiinnili taakkunani uumasunut nakorsaqarnermut inuussutissalerinermullu oqartussaaffik oqaatsimik ataasinnguamilluunniit ilanngunneqanngilaq.
Kielsenip ammaanersiorluni oqalugiaataa
Tamanna Kim Kielsenip ukioq manna ukiakkut katersuunneq ammarnersiorlugu anguniagassatut saqqummiussaanut akerliuvoq.
Naalakkersuisut Siulittaasuat Kim Kielsen, ukiakkut katersuunneq ammarnersiorlugu oqalugiarami ilaatigut oqarpoq:
- Inuussutissalerineq pillugu oqartussaaffiup tamakkiisumik nunatsinnut nuunneqarnissaata piviusunngortinneqarsinnaanissaa piareersarfigisariaqarparput. Inatsiseqarnermut tunngasut naammattumik piareersarfigisariaqaratsigit inatsisartunut siunnersuummik Naalakkersuisuniit saqqummiussiniarpugut.
Naammaginnikkunnaarneq
Sermitsiaq.AG-mit paasineqarpoq, ataatsimiititaliami ilaasortat ilaat naammaginnikkunnaarsimasut, tassa Kim Kielsen arlaannik oqaraangat naalakkersuisoq alla allatut oqartarmat, nassuiaammik aningaasatigut kinguneqaataasussanik qulaajaanissamik siunertaqartumik.