Naalakkersuisut: Aatsitassarsioqatigiiffiup sunniiniarnera akuersaarneqarsinnaanngilaq
Naalakkersuisut Greenland Mineralsimi maalaaruteqarnermut atatillugu, aatsitassarsioqatigiiffik atorfilittanik sunniiniarlutik sulinerminni Avatangiisinut Aqutsisoqarfiup aalajangiinerni oqartussaaneq qularnartoqalersinniarsarisimagaa paasivaat.
Avatangiisinut Aqutsisoqarfimmut maalaaruteqarnermut suliami, Greenland Mineralsip tamakkiisumik ajorsarfigisaani, ”GML-ip atorfilittanut qaffasissunut aamma Naalakkersuisunut ilaasortanut, Aatsitassanik Suliassaqarfinnut Avatangiisinut Aqutsisoqarfimmut akisussaanngitsunut saaffiginnikulasarsimanerat akuersaarneqarsinnaanngitsoq”, Naalakkersuisut siulittaasuat Kim Kielsen aamma naalakkersuisoqarfimmi pisortaq Mette Skarregaard Pedersen allapput.
- Taakku saaffiginninnerit Aatsitassanut Aqutsisoqarfiup aalajangiinerinut oqartussaanermik qularuteqalersitsinissamik siunertaqarput, Kim Kielsen aamma Mette Skarregaard Pedersen, GML-ip pisortaanut John Mairimut allapput, imatullu oqaaseqarput:
- Tamanna akuersaarneqarsinnaanngilaq aamma (uagut, aaqq.) GML-ip taamatut periuseqarnini siunissami taamaatissagaa.