Naalakkersuisut umiarsuarnik takornariartitsisartunut killileersuutinik atorunnaarsitsipput
Naalakkersuisut takornariartitsisartunit kimigiiserfigineqarerlutik eqqarsaasersorluareerlutillu umiarsuarnik takornariartitsisartut aasamut Kalaallit Nunaannut tikinniartut killilersuiffigiunnaarnissaannut piareersimapput. Tamannali piumasaqaatitaqartumik pivoq.
- Ulloq manna killilersuutinik kingullernik atorunnarsitsivigisassarput qilanaarisimavara, Peqqissutsimut Naalakkersuisoq Kirsten L. Fencker pingasunngornermi ullup-qeqqanut tusagassiortunik katersortitsinermi oqarpoq, nangillunilu:
- Nalunaarutit 87-it ukiuni malunni kingullerni atuutsinneqalersimapput. Taamaammat ulapissimaqaagut.
Inuussutissarsiornermut Naalakkersuisup Pele Brobergip (N) ilanngullugu oqaatigaa, killilersuutit maanna atuuttut umiarsuarnik takornariartitsisartunut aporfeqartitsisut martsip aappaani atorunnaarsinneqassasut.
- Naalakkersuisoqarfinniit pingaartissimavarput, piffissaagallartillugu tamatuma takornariartitsisartunut nalunaarutigineqarnissaa, Pele Brober oqarpoq.
Juunip aappaata tungaanut atuutissasoq
Piumasaqaatitaqarporli. Takornariat Kalaallit Nunaannut tikittut akiuussutissalerneqarsimanertik juunip aappaata tungaanuugallartoq uppernarsarsinnaassavaat.
- Piumasaqaatigineqartoq Kalaallit Nunaanni immikkuullarissuunngilaq. Nunarsuarmi sumiiffippassuarni tamanna aamma atuuppoq, Pele Broberg oqarpoq.
- Imaassinnaavoq killilersuutit sivitsorneqartut sivikillineqartulluunniit, tamatumunngali nunatsinni nakorsaanermit peqqinnissaqarfimmiillu inassuteqaatit apeqqutaassapput, Pele Brober oqarpoq.
Brobergip oqaatigaa, nalunaarut nutaaq aalisariutinut atuutsinneqanngitsoq, tassa akiuussutissalerneqarsimanissamik piumasaqaammut aalisariutit ilaatinneqanngillat.
Nunatsinni Nakorsaaneq: Umiarsuarnik takornariatsisartut isumannanngillat
Umiarsuit takornariartaatit napparsimasorpassuaqarlutik Kalaallit Nunaannut tikinnissaat siusinnerusukkut annertuumik ernummatigineqarsimavoq.
Nunatsinnili nakorsaanerup Henrik L. Hansenip oqaatigaa, tamanna aasara peqqinnissaqarfimmut aarlerinartorsiortitsinavianngitsoq.
Nunatsinni nakorsaanerup ilaatigut oqaatigaa, umiarsuit takornariartitsisartut tuniluunnerup killilersimaarneqarnissaanik ukkatarinnissasut, ilaasullu ikiorneqartariaqartut peqqinnissaqarfimmit ikiorneqarsinnaassasut.
Tuniluuttoqarnera annikilliartortoq
Nunatsinni nakorsaanerup pingaarnertut oqaatiginiagaa tassaavoq, Kalaallit Nunaanni tuniluuttoqarnerata annikilliartornera:
- Maani Kalaallit Nunaanni pisut sukkasuupilussuarmik ingerlasimammata maanna nalilerparput, nunami tamarmi tuniluuttoqarnera annikilliartortoq. Assigiinngitsutigulli suli tuniluuttoqartoq.
- Ilulissani, Aasianni maanilu Nuummi malunnartupilussuarmik tuniluuttoqarnera annikilliartorpoq. Upernavimmi omikroni malugineqarpallaarsimanngilaq – tassani siorna tuniluuttoqangaatsiarsimanera pissutaagunarluni. Aamma kujataani tuniluuttoqarnera annertunerpaaffimminiittoq erseqqissumik takuneqarsinnaavoq, nunatsinni nakorsaaneq oqarpoq, nangillunilu:
- Sooq taamatut ingerlasoqarnera erseqqilluinnarpoq. Misissoqqissaagassatut Danmarkimut nassiussimasatsinnut akissutit kingulliit takutippaat, allannguut omikron BS2 tuniluunnerpaasimasoq. Taamaammat sukkasuupilussuarmik tamanna ingerlasimavoq.