Naalakkersuisut timit paniinnarnikut USA-miittut utertinneqarnissaannut pilersaarusiorusuttut
Kalaallit timaat paniinnarnikut USA-miittut piffissaq ungasinnerusoq eqqarsaatigalugu Kalaallit Nunaannut utertinneqartariaqarput, timilli paniinnarnikut Danmarkimi immikkut aaqqissuussami qeritinneqartariaqarnerat pissutigalugu utertitsinissaq akisusinnaavoq.
Politikkerip Doris J. Jensenip (S) ukiakkut ataatsimiinnermi kalaallit timaat paniinnarnikut ullumikkut USA-mi Harvard Universitytimi Peabordy Museumiimiitut sammineqarnissaat siunnersuutigisimavaa .
Timit paniinnarnikut ukiut 500-t missaannik pisoqassuseqassangatinneqarput, 1929-milu Kujataani Uunartumi nassaarineqarsimallutik.
Doris J. Jensenip kissaatigaa, Naalakkersuisut timinik paniinnarnikunik Kalaallit Nunaannut utertitsinissaq suliarialugu aallartissagaat. Naalakkersuisulli taamatoqqissaaq iliorusunngillat.
Naalakkersuisut kalaallit timaasa paniinnarnikut utertinneqarnissaaannut pilersaarusiortoqarnissaa sulissutigerusuppaat.
- Aningaasarpassuarnik naleqassasoq
Naalakkersuisut Doris J. Jensenip siunnersuutaanut tamanut saqqummiunneqaqqamersumi akissuteqarnerminni tamanna ilisimatitsissutigaat.
Nunatta Katersugaasiviata Allagaateqarfiatalu timit paniinnarnikut inissisimaffiat USA-mi Peabody Museum 2019-mi tikeraarsimavaat, Nunattali Katersugaasiviata timit paniinnarnikut utertinneqarnissaat suli piumasarimanngikkaa, Naalakkersuisut ilisimatitsipput:
- Timinut paaniinnarnikunut ilivernullu tunissutinut tunngatillugu suliamut tunngasunut isumakuluuteqarnermik, aamma timit paniinnarnikkut toqqortarineqarnerinut assartorneqarnerinullu atatillugu aningaasatigut allaffissornikkullu kingunerisassai annertusussaanerinik tamanna pingaarnerusumik pissuteqarpoq, Naalakkersuisut Doris J. Jensenip siunnersuutaanut akissuteqarlutik allapput.
Danmarkimi qeritinneqassasut
Suliassap pilersaarusiornerani erseqqinnerusumik paasinarsissaaq, timit paniinnarnikut utertinneqarneri qanoq akissaqarnersut aamma tamatuma kingorna qanoq toqqortarineqassanersut:
- Maannakkut inuit toqusimasut timaasa sinnikui Kalaallit Nunaaneersut amerlanersaat Københavnip Universitetiani Retsmedicinsk Institutimit saqqummersitassatut toqqarneqarsimasut Panum Institutimi toqqortarineqarput.
- Timit paniinnarnikkut Peabodymit angerlaanneqarnerata kingunerissavaa, Danmarkimi tassunga immikkut aaqqissuunneqarsimasimasumi aamma qerititsivimi toqqortarineqarnissaat, Kalaallit Nunaanni atortorissaarutinik pisariartunik peqanngimmat, Naalakkersuisut allapput.