Naalakkersuisut spiralilersuisimaneq akuersaanngilluinnarpaat
Danskit 1970-ikkut qiteqqunnerat tikillugu spiralilersuisimaneranni pissutsit, tassa arnat niviarsiaqqallu 4.500-nik amerlassuseqartut spiralilersorneqarsimaneranni pissutsit misissuiffigineqarnissaat Naalakkersuisunit isumaqatigineqarpoq.
Niviarsiaqqat meeqqat atuarfiini atuartut 13-iinnarnik ukiullit ilanngullugit spiralilertikkiartoqquneqarlutik nakorsamukaqquneqarsimapput. Spirali suunersoq timimullu qanoq sunniuteqartarnersoq niviarsiaqqat arlaannaataluunniit ilisimasimanngilaa, nakorsallu angajoqqaanit akuersissummik pissarsiniartarsimanatik.
DR-ip podcastikkut "Spiralilersuisimaneq" pillugu aallakaatitassiaani, Kalaallit Nunaanni arnat niviarsiaqqallu 4.500-nik amerlassuseqartut piffissami 1965-1975-imi spiralilersorneqarsimanerat pillugu oqaluttuaq taamatut naatsumik saqqummiunneqarsinnaavoq.
Piffissami pineqartumi taamatut innarliisoqarsimanera Naalakkersuisut akuersaanngilluinnarlugu maanna nalunaaruteqarput.
- Suliamut tunngassuteqarsinnaasut tamarmik saqqummiunneqarniassammata Naalakkersuisunit qulaajaasoqarnissaa tapersersorneqarpoq, Meeqqanut, Inuusuttunut Ilaqutariinnullu kiisalu Peqqissutsimut Naalakkersuisoq Mimi Karlsen tusagassiorfitsigut nalunaaruteqarluni oqarpoq.
Naalakkersuisup danskit peqqissutsimut ministeriat Magnus Heunicke attaviginiarpaa, tassani danskit spiralilersuisimanerisa qulaajaaffigineqarnissaanut tunngatillugu suliap ingerlateqqinneqarnissaa ataatsimiissutiginiarlugu.
Tusaannga atorneqarsinnaasoq
Kalaallit Nunaata peqqinnissaqarfik ulloq 1. januar 1992 akisussaaffigilerpaa. Naalakkersuisut taamaammat 1960-ikkunni 1970-ikkunnilu spiralilersuisimanermut atatillugu paasissutissaataat annikitsuararsuupput.
Tusaannga
Imminut toqunnissamik eqqarsaateqaraanni imaluunniit kiserliortutut misigisimagaanni Tusaannga 801180 aqqutigalugu sianerfigineqarsinnaavoq imaluunniit 1899 aqqutigalugu sms-ertoqarsinnaalluni kinaassutsimik isertuussilluni akeqanngitsumillu siunnersuisartunik oqaloqateqarniarluni.
Tusaanngap ammasarfiit tassaapput:
Ataasinngorneq-sisamanngorneq nal. 9.00-22.00
Tallimanngorneq nal. 9.00-04.00
Arfininngorneq nal. 16.00-04.00
Sapaat nal. 16.00-22.00
-Soorlu inatsimmi allaqqasoq, Kalaallit Nunaanni Peqqinnissaqarfik napparsimasut ataqqinassusaasa, innimigisassaanerisa namminnerlu aalajangiisinnaassuseqarnerisa ataqqineqarnissaannut maleruagassat naapertorlugit suliaqarpoq. Taamaattumik misissuineq, katsorsaaneq paaqqutarinninnerluunniit aallartinneqassanngillat nangeqqinneqaratilluunniit napparsimasoq paasissutissinneqareernermigut akuerseqqaartinnagu, tusagassiorfitsigut nalunaarummi allassimavoq.
Peqqissutsimut Naalakkersuisup Mimi Karlsenip arnat spiralilersuinermut peqataasimasut oqaloqateqarnissamut pisariaqartitsisut Tusaanngamut oqarasuaat 80 11 80 imaluunniit 18 99-imut sms-erlutik saaffiginninnissaannik kaammattorpai. Oqaloqateqarnermi kinaassuseq isertuunneqarsinnaavoq.