Naalakkersuisut siulersuisunut tunngatillugit ammanerusumik ingerlatsisoqartarnissaanik sulissuteqartut
Transparency International Greenlandimit piumasarineqarpoq, Namminersorlutik Oqartussat aktiaatileqatigiiffiutaanni siulittaasunik siulersuisunilu ilaasortanik taarsiinermut atatillugu ammanerusumik ingerlatsisoqartarnissaa.
Siulersuisuni ilaasortat ataasiakkaat qanoq piginnaasaqarpat?
Apeqqutit arlallit Transparency International Greenlandimit (TIG) akissutissarserusunneqartut taanna ilagaat. Suliniaqatigiiffimmit maluginiarneqarsimavoq, Namminersorlutik Oqartussat aktiaatileqatigiiffiutaanni arlalinni siulersuisut siulersuisunilu ilaasortat taarsersorneqarsimasut.
Taarsersuineq ammasumik ingerlanneqarsimanngilaq, tamannalu ilaatigut ajornartorsiutinik pilersitsisarpoq, tusatsiakkat ingerlaartinneqartalernerannut tamanna tunngaviusarmat, TIG-imit oqaatigineqarpoq.
AAMMA ATUARUK: Transparency Greenland Naalakkersuisunut kaammattuuteqarpoq
Naalakkersuisut isornartorsiut tusaatissatut tigugaat, siulittaasoq Múte Bourup Egede allakkatigut akissuteqarluni taamatut oqarpoq.
Ingerlatsineq ammanerusumik ingerlanneqartalissasoq
Siulittaasup ilisimatitsissutigaa, Namminersorlutik Oqartussat ingerlatseqatigiiffiutaannut atatillugu piginnittuunermi politikkissaq nutaaq politikkikkut siammasissumik isumaqatigiissuteqarfigineqarnissaa qulakkeerniarlugu Naalakkersuisut suliniuteqartut. Partiinik isumaqatiginninniarneq siulleq septembarip qaammataani ingerlanneqarsimavoq, isumaqatiginninniarnissallu tullii politikkisssaq inissinniarlugu ukiap ingerlanerani isumagineqassallutik.
Siulittaasoq naapertorlugu, tassani politikkikkut sinaakkutissaq politikkeriniakkamut tunngaviusussaq qulakkeerneqartussaavoq:
- Suliap ingerlateqqinneqarnissaanut arlalitsigut ammanerusumik ingerlatsisoqartarnissaa Naalakkersuisunut pingaaruteqarpoq.