Naalakkersuisut singernikkut kalunneqartitsisarnissaq eqqarsaatigeqqippaat

Nunami pinerluuteqarsimasunut inissiisarfiit ulikkaaqqapput, tamannalu pissutigalugu pineqaatissinneqarsimasut 64-it - taakkununnga ilanngullugit inuit kinguaassiuutitigut innarliisimasut arlallit pillaatissaminnik suli atuilinngillat. KNR-ip tamanna qanittukkut oqaluttuaraa.

Taamaammat folketingimi ilaasortap Aaja Chemnitz Larsenip (IA) siunnersuutigisimavaa, illoqarfinni anginerusuni singernikkut kalunneqartitsisarnerup atuutsinneqalersinnaanera.

Naalakkersuisut tgamanna maanna eqqarsaatersuutigigaat, Isumaginninnermut, Ilaqutariinnermut Inatsinillu Atuutsitsinermut Naalakkersuisoq Martha Abelsen (S) Peter Olsenimut (IA) allakkatigut akissuteqarnermini ilisimatitsivoq:

Iluaqutaassanersoq qularnartoq

- Naak tamanna eqqartuunneqarsimasunut assigiinngisitsinermik kinguneqassagaluartoq,
pillaatisiap atorneqarnissaanut utaqqisut amerligaluttuinnarnerat eqqarsaatigalugu
illoqarfinni anginerni singernikkut kalunneqartitsinermik misileraanissaq
illersorneqarsinnaanersoq Naalakkersuisut isumaliutigeqqinniarpaat.

- Taamaattoqassappat Naalakkersuisut Justitsministeeriaqarfik tamanna pillugu
oqaloqatiginiarpaat, Martha Abelsen allappoq.

Eqqaasitsissutigaali Kalaallit Nunaanni singernikkut kalunneqartitsinermi unammilligassat arlaqarnerisa, pineqaatissinneqarsimasunut inissiisarfimmut inissinneqarnissamik utaqqinerup sivikillisinneqarsinnaanera qularnartikkaat.

Unammilligassat amerlanerusut

Singernikkummi kalunneqartitsinissamik aaqqissuussisoqarsinnaanera Pinerluuteqarsimasunik Isumginnittoqarfimmi siusinnerusukkut misissorneqarsimavoq, aqutsisoqarfimmilli aaqqissuussaq arlalinnik pissuteqartumik inassutigineqarsimanngilaq:

Annemette Nyborg Lauritsenip misissuisimanera naapertorlugu kalaallit
isertitsivimmiilinnginnerminni 47 %-ii angerlarsimaffeqanngitsuupput 45 %-iilu suliffeqanngitsuullutik. Taamaattumik isertitsivimmiittut amerlasuut ineqannginnertik suliffeqannginnertilluunniit pissutigalugu singernikkut kalunneqartinneqarnissamut tulluutinngillat.

Kalaallit Nunaanni isertitsivimmiittut akornanni amerlangaatsiartut atornerluisuupput.

Isertitsivimmiittut amerlanersaat ilaqutariit iluanni persuttaanermik pissuteqarlutik
pillaatisiaminnik kinguaassiutitigulluunniit atornerluinermik isertitsivimmiittarput, taamaammallu angerlarsimaffimmi atuinissaat ajornarluinnarluni.

Kalaallit Nunaanni piffiit ilaanni attaveqarniarneq ajornakusoorpoq. Nunap qanoq issusia apeqqutaalluni sumiiffiit ilaat pinerluttulerisut nakkutilliiniarnerannut ajoqutaasinnaalluniluunniit.

IlIoqarfinni minnerni nunaqarfinnilu nakkutilliisinnaaneq killeqarpoq, taamaattoqarneratalu illoqarfinni annerni eqqartuunneqarsimasut akornanni, illoqarfinni minnerni nunaqarfinnilu periarfissaqanngitsumik assigiinngisitsinermik periarfissiissaaq.

Martha Abelsenip ernumanartoqartippaa, pillaammik atuisussatut utaqqisut amerliartornerat, ajornartorsiullut tamanna qanoq aaqqiiffigineqarsinnaanersoq pillugu Pinerluuteqarsimasunik Isumaginnittoqarfik Justitsministeeriaqarfillu oqaloqatigai.

Pinerliisuminnik suli naapitsisinnaasut

- Inissiisarfinni inissaaleqineq kisimi pissutaaginnarani aammali pingaartumik
inissiisarfianni sulisussanik ilinniarsimasunik amigaateqarneq inissaaleqinermi
unammilligassaavoq. Inissiisarfinni paarsisut pitsaanerusumik akissarsiaqalernissaannik
ilinniarnissamullu periarfissaannik isumaqatigiissuteqareerup kingorna tamanna
pitsaanerulissajunnarsivoq, Martha Abelsen Peter Olsenimut allappoq.

Aaamma eqqaasitsissutigaa, pinerliisimasoq pillaatisiaminik atuigaluartoq eqqugaasut pinerliisuminnik naapitsisinnaanerat, Tamatumunnga pissutaanerarpaa,
eqqartuunneqarsimasut sulinerminnik ilinniarnerminnilluunniit inissinneqarsimanerminni
ingerlatitsiinnarsinnaatillugit eqqartuusseriatsip aaqqissuunneqarsimanera.