Naalakkersuisut qinersinermut inatsimmik allannguerusupput
Illuatungiliuttut qinersisoqarnissaa anguniarlugu inatsisissatut siunnersuutaanni pissutsit immikkut illuinnartut Naalakkersuisut ilanngutsikkusuppaat, ilaatigullu innersuussutigalugu coronap nassataanik nunap immikkut illuinnartumik inissisimanera.
Naalakkersuisut allannguutissatut siunnersuutaat illuatungiliuttut qinersinissaq anguniarlugu inatsisissatut siunnersuutaasa siullermeerlugu suliarineqarneranut ilanngunneqarniannginnera qaqutigoortuuvoq, aappassaanilli aatsaat suliarineqalerpat ilanngunneqartussanngorsimalluni. Nalinginnaasuugaluarpoq inatsimmut allannguutissat pingaarutillit inatsisip Inatsisartut inersuanni piffissaqarluarluni oqallisigineqarnissaa anguniarlugu siullermeerinninnermi ilanngunneqartarnerat.
Naalakkersuisut allannguutissatut siunnersuutaanni qitiutinneqartoq tassaavoq, coronap atuunnerani suliniutissatut pisariaqartinneqartut ingerlanneqarsinnaanerat, apriilillu arfernani qinersisoqareerpat aatsaat ingerlanneqalinnginnissaat. Allannguutissatut siunnersuummi aamma sanaartugassanik suliarinnittussarsiuussisarneq sanaartugassanillu isumatigiissuteqartarneq pillugit suliniutissat pineqarput.
2/3-nik amerlanerussuteqarnissaq pisariaqartoq
Siunnersuummi allassimavoq, suliniutit atorfinni suliassat akornuserneqanngitsumik ingerlaannarnissaannut ilaasutut nalilerneqaraluartoq, ”tamanna qineqqusaarnerup nalaani Inatsisartut annertunerusumik akuutinneqarnissaat naleqqussinnaavoq, taamaalilluni suliniutissanik akuersinermi il.il., suliniutit qineqqusaarnermik akornusersuinnginnissaat imaluunniit partiit aalajangersimasut partiinut allanut sanilliullugit iluaqutissarsitinneqannginnissaat (imaluunniit taamaassorinninnissaq) immikkut eqqarsaatigineqarsinnaassalluni”.
Erseqqissaassutigineqarpoq, Naalakkersuisut siunnersuutaat partiini siulittaasunit, Inatsisartuni ilaasortanik minnerpaamik 2/3-iinik tunuliaqutaqartunit taperserneqarsimasussaasoq. Amerlanerussuteqartunit taperserneqarnissamut pissutaasoq imatut tunngavilersorneqarpoq:
- Peqatigisaanik coronamut iliuusissanik aallartitsinissanut pisariaqarluinnartunut ikinnerussuteqartut akornusersuinissamut periarfissinneqannginnissaat qulakkeerneqassaaq.
Nassuiaatini erseqqissaassutigineqarpoq, ”suliniutissat aalajangersagaq malillugu ingerlanneqartussat coronavirusimik tunngavilersugaassapput imaluunniit tassaassallutik suliniutissat coronavirusip toqqaannartumik malitsigisaanik inuiaqatigiinni ajoqusiisumik sunniinermik pakkersimaarinninnissamik siunertaqartut”.
Ikiorsiissutit inuussutissarsiortunut ikiorsiissutinut sanilliunneqartut
Qineqqusaarnerup nalaani aalisarnermut pisortat ikiorsiissuteqarsinnaanerat nalunarpoq. Apeqqutaatinneqarpormi ikiorsiissutissat imaluunniit inuussutissarsiortunut ikiorsiissutissat pineqarnersut.
Naalakkersuisut inatsimmut allannguutissatut siunnersuumminni tamanna imatut nassuiarpaat:
- Assersuutigalugu aalajangersagaq naapertorlugu inuussutissarsiortunut ikiorsiissutissat assigisaalluunniit annertunerpaatigut inuiaqatigiinni pissutsinik allanik tunngavilersugaasut aallartinneqarsinnaanngillat, soorlu niuerfinni akigititat pissusissamisoorunnaarnerat imaluunniit ajornartoornerit allat. Taamaalilluni assersuutigalugu inuussutissarsiornermi ajornartoornermut pissutaasoq coronap ajornartorsiutaaneranit allarnerusunik tunngaveqarpat, aalajangersagaq malillugu aalisarnermik inuussutissarsiuteqartunut tapersiisoqarsinnaanngilaq.