Naalakkersuisut: Qimaasut Nunatsinnit sullinneqarsinnaanngillat

Savalimmiormiut lagmandiata Sambandspartiimi siulittaasoq Kaj Leo Holm Johannesenip oqaatigaa qimaasut Savalimmiuniissinnaasariaqartut, tamanna Sermitsiaq.AG-mi allaaserineqartareerpoq.

- Ukiuni kingulliunerusuni aatsaat taama amerlatigisunik qimaasoqarpoq. Nittartakkakkut isiginnaarutikkullu aatsaat taama ajortigisunik takuvugut. Nunarsuarmioqatitsinnik ikiuisalernissarput eqqarsaatigilertariaqarparput, Kaj Leo Holm Johannesen ukiortaami oqalugiarnermini ilaatigut oqarpoq.

Kaj Leo Holm Johannesenip oqalugiaatini raatiukkut itisilerlugu nassuiarpaa Savalimmiut ilaqutariit qimaasut 60-t Savalimmiuni tikilluaqqusaalernissaat anguniarlugu.

- Una nunatsinni oqaluuserineqarnikuunngisaannarpoq. Qimaasut inooriaatitsinnik akornusersuilernissaat immaqa ernumagalugu suli oqallisigineqarnikuunngilaq, Kaj Leo Holm Johannesen Kringvarp Føroyamut oqarpoq.

Savalimmiuni lagmandip taamatut oqarnera aalassassutigingaatsiarneqarpoq. Naalakkersuisooqataasunit Folkeflokkenimit tamanna isumaqatigineqanngilaq. Nunaqqatigisat ikiornissaat annertusineqassasoq oqaatigaa. Taamaakkaluartoq aamma lagmandip oqaasii Amnesty Internationalimit taperserneqarput.

Politikkikkut siammasissumik oqallinnissaq
Syriamiut qimaasut Kalaallit Nunaannut aamma tikilluaqqusaassanersut aperineqarami nunanut allanut naalakkersuisup Vittus Qujaukitsup ima oqaaseqarfigaa:

- Nunat allat assigalugit Kalaallit Nunaat inunnut ajornartorsiortunut ikiuisussaatitaavoq. Kisianni una suliassarujussuuvoq, apeqqut suliarineqarluaqqaartariaqarpoq apeqqut isummersorfigissagaanni. Politikkikkut siammasissumik oqallisigineqaqqaassaaq, Vittus Qujaukitsoq Sermitsiaq.AG-mut oqarpoq.

- Qinnuteqartut nunami toqqissisimanartumi qinnuteqarnissaat pisariaqarpoq. Taamaattumik Syriamiut qinnuteqaataat Danmarkimit suliarineqartussaapput. Nunatsinni qimarngusut pillugit siammasissumik politikkikkut suli oqallisigineqarnikuunngilaq, taamaattumik qimarngusunut nunasisunullu suli erseqqissumik suliaqarnikuunngilagut.

Pisinnaatitsissuteqannginneq
- Savalimmiormiut lagmandiata ilaqutariit 60-nik qimaasunik Savalimmiuniititaqarusuppoq. Assinganik Kalaallit Nunaanni taamatut aalajangertoqarsinnaanngila?

- Oqareernittut suli qimaasunik ikiuinissamut pisinnaatitsissuteqanngilagut. Nunanut allanut oqartussaqarfiup angerlaanneqarnissaa sulissutigineqaleruttorpoq. Taaaattumik maannakkut oqaatigineqarsinnaanngilaq qanoq iliuuseqarsinnaanersugut.

- Nunanut allanut naalakkersuisutut tamanna sulissutigerusunngiliuk?

- Tamanna oqaatiginissaa siusippallaarpoq. Qimaasunut politikki suli erseqqissumik inissinnikuunngilaq, Vittus Qujaukitsoq oqarpoq.

Danmarkip inuttussusaanut naatsorsuigaanni - soorlu 1:100 - Savalimmiunut qimaasut 60-it Danmarkimut sanilliutissagaanni ilaqutariit 6000-iussapput. Ilaqutariit meerartaqarpata kisitsit allisinnaavoq.