Naalakkersuisut politikkikkut upperisarsiornermilu tv-kkut ussassaaruteqartarneq inerteqqutinngortinniarpaat

Radiukkut tv-kkullu aallakaatitsisarneq pillugu InatsisartutInatsisaat allanngorteqqinneqartussanngorunarpoq. Allanngortinneqarpat, politikkikkut upperisarsiornermilu ussassaarutit tcv-kkut aallakaatinneqarnissamut inerteqqutaalissapput.

KNR

Politikkikkut upperisarsiornermilu ussassaarutit tv-kkut aallakaatinneqarnissamut inerteqqutaalluinnalissapput.

Politikkikkut upperisarsiornermilu ussassaarutit inerteqqutaatilerniarlugit inatsisissatut siunnersuut sisamanngornermi oqaluuserineqassaaq. Inerteqquteqarniarneq siusinnerusukkut attanneqarsinnaasimanngilaq, inatsit tassunga attuumassuteqartoq inissinneqarsimanngimmat - tamannalu ajornartorsiortitsisimavoq.

2012-mi nungusaataanngitsumik aalisarneq pillugu filmiliaq Namminersorlutik Oqartussanit peqqussuteqartoqarneratigut KNR TV-kkut aallakaatinneqarunnaarpoq, Namminersorlutik Oqartussanit isumaqartoqarmat filmi politikkikkut oqariartornerusoq. Ombudsmandilli tamatuma kingornatigut aalajangiiffigaa, radiokkut tv-kullu ussassaarisarneq aningaasalersuisarnerlu pillugit inatsimmut tamanna naapertuutinngitsoq.

Nalunaarummi allannguisoqartoq

Ocean North taamanikkut filmiliortuusimasoq ombudsmandimut naammagittaalliuuteqarsimavoq. NGO-nit isumaqartoqarmat, taamatut imallit politikkikkut oqariartuutaasutut nalilerneqassappata, innuttaasunut inuiaqatigiinnullu paasissutissiisarnermut tamanna annertuumik kingunerluuteqassasoqrakter.

Ombudsmandimillu NGLO-t taamanikkut ilalerneqarput. Tassani filmimik takutitseqqusiunnaarnermut inatsimmi tunngavissaqanngitsoq tunngavilersuutigineqarluni.

Ombudsmandip aalajangiinerata malitsigisaanik nalunaarut allanngortinneqarsimavoq. Taamaalilluni tv-kku radiokkullu ussassaarutinik takutitsisinnaaneq inerteqqutaajunnaarluni.

Naalakkersuisulli inatsit maanna allanngortinniarpaat, tassa inerteqqut atuuttussanngortinneqassaaq siunissamilu politikkikkut upperisarsiornermilu ussassaarutit tv-kkut takuteqqusaajunnaassallutik.

Inatsisissatut siunnersuut akuersaarneqassappat, nungusaataanngitsumik aalisarneq imaluunniit Kuannersuarni aatsitassarsiorniarneq pillugit ussassaarutit KNR TV-kkut takutinneqarsinnaajunnaassapput.

Powered by Labrador CMS