Naalakkersuisut politikkikkut ataqatigiissaarisumik atorfinitsitsipput
Jane P. Lantz, Inuit Ataqatigiinni politikkikkut siunnersortiusimasoq maanna Naalakkersuisunut politikkikkut ataqatigiissaarisutut atorfeqalerpoq.
Inuit Ataqatigiinni politikkikkut siunnersortaasimasoq Jane P. Lantz Naalakkersuisunut, Múte B. Egedemit siuttuuffigineqartunut, politikkikkut ataqatigiissaarisutut atorfeqalerpoq.
Marlunngornermi 6. juli atorfittaamini sulilerpoq.
Naalakkersuisoqatigiinnissamut isumaqatigiissut Inuit Ataqatigiinnit Naleqqamiillu majimi atsiorneqartoq, aallaavigalugu Naalakkersuisut politikkikkut sulinerat ataqatigiissaarlugu suliaqartussanngorpoq.
- Politikkikkut suliat killiffii, suullu suliassaanersut pillugit ataqatigiissaarisassuunga. Suliat inuiaqatigiinnut pingaaruteqarmata suliat ataatsimut tamaasa isigalugit sulinerup ingerlanissaanut ataqatigiissaarissaanga , Jane P. Lantz atorfittaamini suliassani pillugit oqaluttuarpoq.
- Politikkikkut ataqatigiissaarisutut Naalakkersuisut siulittaasuat qanimut suleqatigissavara. Aammali Naalakkersuisunut ilaasortat allat suleqatigissallugit, oqarpoq.
Naalakkersuisuni ilaasortat quliupput.
Politikkikkut suliakkiussat ukkatarineqassapput
Inatsisartut Naalakkersuisullu siunnersuutaat akuerineqartut Naalakkersuisunit aallartisarneqartarnissaanut qulakkeerinninnissaq aamma ilaatigut Jane P. Lantzip isumagisussanngorpaa.
- Inatsisartut suliakkiussaasa Naalakkersuisunit atuutsinneqarnissaat aamma eqqumaffigineqartussaavoq. Taamaammt Inatsisartut sulinerannut malinnaaqqissaarnissaq aamma pisariaqarpoq, Jane P. Lantz naggasiivoq.