Naalakkersuisut plug-in hybridbiilit akitsuusernerisigut miliuunerpassuarnik aallerniartut

Plug-in hybridbiiliuteqaraanni - billi nunami maani ukiorpaalunngortuni nuannarineqarluarsimasoq - malunnaatilimmik akitsuuserneqarnissaq naatsorsuutigisariaqarpoq.

Biili batteriiligaavoq, taamaalillunilu batterii immeriarlugu kilumiiterini arlalinni ingerlasinnaalluni. Biili pineqartoq eqqunneqarnerani akitsuutitigut motoorinullu akitsuutitigut annertumik akikillisaaffigineqartarsimavoq.

Naalakkersuisulli aalajangiisinnaasuuppata akikillisaaffigineqartarnerat atorunnaarsinneqassaaq. Inatsisissatut siunnersuut tusarniaassutigalugu aallartinneqaqqammersoq naapertorlugu, plug-in hybridbiilit motoorinut akitsuutaat 2026-miit ukiumut 13.000 koruuniulissaaq.

Tassa ullumikkut akitsuutip 6.554 koruuniusup marloriaatingajaanik akitsuuserneqartalissallutik.

Ukiut sisamat ingerlaranni atorneqalissasut

2026-mi akitsuutit qaffasinnerusut atorneqalerpata, Nunatta Karsia 6,4 millioner koruuninik isertitaqartalissasoq naatsorsuutiginqarpoq. Aningaasanit taakkunannga 5,5 millioner koruunit missaanniittut innuttaasunit pissarsiarineqartassapput, nalilerneqarsimammat plug-in hybridbiilinik atuisut arfineq-pingasuugaangata arfineq-marluk inuinnarnit atorneqartartut.

Plug-in hybridbiilinik piginnittunut siunnersuutip aningaasaqarnikkut kingunissai pillugit nassuiaateqarnermi erseqqissaassutigineqarpoq, plug-in hybridbiilinut maannamut annertuumik akikillisaasoqartarsimasoq:

- Innuttaasut 1. januar 2023 sioqqullugu plug-in hybridbiilinik pissarsisimasut akileraarutinik akitsuutinillu immikkut iluaqutaasussanik iluaquserneqarsimapput, siunnersuummut nassuiaammi allassimavoq.

Biilit innaallagiatortut plug-in hybridbiilinut ukiumoortumik akitsuutigineqartartut annertoqqataannik maannamut akitsuuserneqartarsimapput. Biilit innaallagiatortut qanoq innaallamik atuitiginerat tunngavigalugu ukiumoortumik akitsuuserneqartalissapput. Taamaalilluni biilinik innaallagiatortunik piginnittut ilaannut tamanna akikinnerulissaaq.

Eqqussinermi akitsuusiisoqartalissasoq siunnersuutigineqartoq

Biilit innaallagiatortut aamma plug-in hybridbiilit eqqunneqarneranni akitsuusiisoqartalissasoq siunnersuutigineqarpopq.

Akitsuutitigut isertitat 2024-mi 35 millioner koruuniussasut naatsorsuutigineqarpoq. Naalakkersuisut aningaasat isertinneqartut sulinermut ilanngaatip qaffanneqarnissaanut atorniarpaat.

Tamannali plug-in hybridbiilinik tunisaqartarnermut annertuumik aamma kinguneqassasoq nalilerneqarsimavoq:

- Plug-in-hybridbiilinut akitsuusissalerneq, hybrid-plugin-biilinik eqqussisarnerup annikillerujussuarneranik kinguneqassasoq naatsorsuutigineqarpoq. Qanoq pisoqaraluarpalluunniit taamatut annikillinera inuit biiliinik eqqussisarnerup annertusineranit illuatungilerneqartussaavoq, ilanngullugit biilit innaallagissamik ingerlatillit aamma biilit allat silap pissusaanut sunniinnginnerusartut, inatsisissatut siunnersuummi allassimavoq.

Avatangiisinut iluaqutaanissaat qularnartoq

Naalakkersuisut akitsuutinik qaffaaniarnermut tunngavilersuinerminni innersuussutigisimavaat, plug-in hybridbiilit biilinut allanut sannilliullugit avatangiisinut iluaqutaasinnaanerat qularnarmt taakkut tapiiffigineqartarnerat isumaqanngitsoq.

Naalakkersuisut taamatut isumaqartoqarneranut tapersiillutik Danmarkimi Klimarådip misissuisimanera innersuussutigaat, misissuinermi paasineqarsimammat biilinik innaallagiatortunik aamma plug-in hybridbiilinik sanaartornermi biilinik nalinginnaasunik sanaartornermut sanilliullugu avatangiisit innarlerneqarnerusartut. Taamaammat biilit taakku marluk kilometererpassuanik ingerlareernerminni aatsaat avatangiisinut innalliinnginnerulertarput:

- Klimarådip misissuinerani takuneqarsinnaavoq biili innaallagiartortoq mikisoq aatsaat 50.000 kilometerinik ingerlaareeraangami silap pisussaanut innarliinnginnerulertartoq, biilillu anginerit 100.000 kilometerinik ingerlaareeraangamik innarliinnginnerulersartut. Plug-in-hybridbiilimut tunngatillugu tamanna 250.000 kilometeriuvoq, siunnersuummut nassuiaammi allassimavoq.

Ukiuni 45-ni ingerlasassut - biilit innaallagiatortut siunissaasut

Naalakkersuisut Pinngortitaleriffimmit misissuinaneq innersuussutigaat, tassani Kalaallit Nunaanni biili inummit pigineqartoq agguaqatigiissillugu ukiumut 5.450 kilometerinik ingerlaartartoq missingerneqarsimavoq.

- Kisitsisitigut agguaqatigiissitsineq tamanna aallaavigissagaanni biili innaallagiartortoq mikisoq biilimut dieselitortumut sanilliullugu Kalaallit Nunaanni ukiuni 9-ni ingerlaareersimassaaq silap pissusaanut innarliisinnaanngussaguni. Tamanna biilimut innaallagiartortumut tunngatillugu ukiut 18-iupput, plug-in-hybridinullu tunngatillugu ukiut 45-ullutik, inatsisissatut siunnersuummut nassuiaammi allassimavoq.

Naalakkersuisut oqaatigaat kisitsisit pineqartut Kalaallit Nunaannut toqqaannartumik nuunneqarsinnaanngitsut, inerniliussimavaalli plug-in hybridbiilit avatangiisinut iluaqutaasinnaanerat qularnartoq, taamaammallu akitsuutit qaffanneqartariaqartut.

Akerlianik biilinut innaallagiatortut ukiumoortumik akitsuutit appasinnerusut atuutsiinnarneqassapput:

- Biiliutigineqartut biilinut innaallagiartortunut nuunnerat ikummatissanik eqqussorneqartunik pinngitsuuisinnaajunnaarnermut annikillisaaffiussaaq, tassami innaallagissamik atuinerup ilarujussua kalaallit erngup nukinganik nukissiorfiisigut isumagineqarmat. Tamanna ukiuni tulliuttuni annertuseriartortussatut ilimagineqarpoq, nassuiaammi allassimavoq.