Naalakkersuisut pigisanik nalilinnik tuniniaaniartut
Aningaasanut inatsisissaq pillugu isumaqatigiissummi, naalakkersuisooqatigiit ataasinngormat saqqummiussaanni atuarneqarsinnaavoq, Roya Greenlandip ilaatigut namminersortunngortinneqarneranit aningaasat mittarfiliornernut aqquserniornermullu aningaasaliissutigineqarsinnaasut.
Naalakkersuisut Royal Greenlandimik piginneqataassutsimik 33 procentii angullugit tunisaqarnissamut piareersimapput, Kalaallit Nunaanni attaveqaatit - assersuutigalugu Sisimiut Kangerlussuullu akornanni aqquserniornissaq nunamilu sumiiffinni assigiinngitsuni nutaanik mittarfiliornissaq aningaasassaqartinniarlugit.
Royal Greenlandimik piginneqataalersussat nutaat neqeroorfigineqarnissaannut inaarutaasumik aalajangiisoqannginnerani misissuisoqassasoq, isumaqatigiissummi allassimavoq.
- Royal Greenlandip ilaanik tunisaqarnissaq piffissaagallartillugu aaqqissuunneqassaaq, tassani tunisaqarnermi nunatta karsiata iluanaarutissaasa annertunerutinneqarnissaat siunertaralugu, partiit aningaasanut inatsitsissamik isumaqatigiissuteqartut ilisimatitsipput, taakku 2021-mi iluanaarutissanik missingiisimanngillat, ”misissuinissaq eqqarsaatigalugu aalajangiissuteqarnissaq utaqqissunneqartariaqaroq”, oqaatigalugu.
Steen Lyngep Demokraatineersup apriilip qaammataanili piumasarisimavaa, Royal Greenlanbdip qanoq qanorlu annertutigisumik namminersortunngortinneqarsinnaaneranik inerniliisussamik misissueqqissaartoqarnissaa.
Aamma atuaruk: D-mit piumasaqaat: Royal Greenland namminersortunngortinneqassaaq
Nalunaarusiap Namminersorlutik Oqartussat ingerlatseqatigiiffiutaasa akornanni namminersortunngorsarneqarsinnaasutut piukkunnarnerpaatut tikkuussai naapertorlugu Steen Lynge piumasaqaateqarsimavoq. Nalunaarusiami Royal Greenland namminersortunngorsarneqarnissatut piukkunnarnerpaatut taaneqarpoq.
Aamma atuaruk: Nalunaarusiaq: Royal Greenlandip tunineqarnissaa
Steen Lynge isumaqarpoq, Royal Greenland ingerlatseqatigiiffittut inuiaqatigiinnik sullissisussaagaluarluni ingerlanneqarnera akisuallaartoq iluanaarutigisartagaalu appasippallaartut.
Royal Greenlandimi pisortaanerup Mikael Thinghuusip siusinnerusukkut Sermitsiaq.AG-mut oqaatiginikuuaa, ilaatigut namminersortunngorsaaneq suliffeqarfimmut iluaqutaasinnaasoq, suliffeqarfik nutaamik ingerlalluaqqilersinnaammat.
Prisen for medejerskab
Namminersortunngorsaanissaq pillugu nalunaarusiami, Naalakkersuisut Siulittaasuata Naalakkersuisoqarfianit suliarineqarsimasumi atuarneqarsinnaavoq, Royal Greenland tunineqartuuppat, Nunatta Karsia 2,5 aamma 5 milliarder koruunit akornanni ataasiartumik isertitaqartissagaluartoq.
Ingerlatseqatigiiffiup pingasorarterutaa tunineqassappat, iluanaarutaasut attaveqaatinut aningaasaliissutigineqartussat 825 millioner koruunit aamma 1,65 milliarder koruunit akornanni annertussuseqassapput.