Naalakkersuisut Paamiunut immikkut ikiuunnissamut piareersimasut
Paamiuni ikuallattoqarnerani eqqungaasut qanigisaasullu misiginneqatigalugit, Naalakkersuisut paasititsipput. Pisariaqartillugu kommunimut ikiuutissalluta piareersimavugut, ilisimatitisipput.
Paamiuni ikuallattoqarsimaneranut atatillugu Naalakkersuisut Kommuneqarfik Sermersuumut ikiuutissallutik piareersimapput. Paamiuni marlunngornerup unnuaani ikuallattoqarmat inuit pingasut ajunaarput.
- Naalakkersuisuniit annertuumik eqqumaffigineqarpoq immikkut pisariaqartitsisoqassanersoq, taamaattumik ippassaq Kommuneqarfik Sermersooq nalunaarfigineqarpoq kommuni ikiortariaqassappat Naalakkersuisut immikkut piareersimasut ikiuunnissaminnut, Naalakkersuisut tamarmiusut sinnerlugit, Attaveqaqatigiinnermut Naalakkersuisoq, Karl Frederik Danielsen Sermitsiaq.AG-mut ilisimatitsivoq.
- Annermik pineqarpoq ikiuigasuarnissamut upalugaarsimaneq aammalu ikuallattoqarnerani upalugaarsimaneq, Attaveqaqatigiinnermut Naalakkersuisoqarfimmit nalunaarutigineqarpoq.
Naalakkersuisut siulittaasuat maanna Paamiuniippoq. Namminersorlutillu Oqartussat erfalasuminnik qiteqqusimasimasut, Namminersorlutik Oqartussat ilisimatitsipput.
- Paamiuni ikuallattoqarnerani eqqungaasunut nunaqqataasunullu Naalakkersuisut misiginneqataangaarput. Taamatut nalaataqarneq annertuumik inunnut ataasiakkaanut aammalu inuiaqatigiinnut eqquisarmat Paamiormiunut misiginneqataangaarpugut, Karl Frederik Danielsen, Naalakkersuisut tamarmiusut sinnerlugit oqaaseqarpoq.