Naalakkersuisut oqaatsinut piumasaqaat pillugu: Procentilersuinianngilagut
Ilinniartitsisut 80 procentiisa ukiut qulit ingerlaneranni kalaallisut ilinniartitsisalernissaannut piumasaqaat naammassissallugu ajornakusoortorujussuusinnaavoq, Naalakkersuisut taama naliliipput.
Kalaallit Nunaanni ilinniarneq kalaallisut ingerlanneqassaaq.
Siumumeersoq Doris J. Jensen taama isumaqarpoq, taassuma ukiut qulit ingerlaneranni ilinniarfinni Ilisimatusarfimmilu ilinniartitsisut ikinnerpaamik 80 procentiisa kalaallisut ilinniartitsisalernissaat anguniarlugu periarfissat suunerinik misissuititserusuppoq:
- Ukiorpassuarni qineqqusaarutigineqartarpoq kalaallisut oqaaseqartut amerlanerusut ilinniagaqarnissaat. Kisianni qinersineq naammassisorlu oqallinnerillu qaangiukkaangata aarleqqutigineqalertarpoq ilinniagaqassutsip appariartulernissaa.
- Eqqaasariaqarparput nunarpassuaqarmat nammineq oqaatsit atorlugit inuusuttunik ilinniarfiusartunik, allaat ilisimatusartoqartarluni, aammalunammineq oqaatsit atorneri peqqutigalugit ilinniagaqassuseq appasinnerusutut isigineqarneq ajorluni, Doris J. Jensen siunnersuumminut tunngavilersuilluni taama allappoq.
Taassuma ilaatigut digitalimik tuluttuumiit aamma danskisuumit kalaallisuunngorlugit nutserinermut periarfissat tamatuma piviusunngornissaanut ikiorsiissutaasinnaasoq naatsorsuutigaa.
Procentitaqanngitsumi allannguutissatut siunnersuusiortut
Ilinniarfinni kalaallisut oqaatsinik atuinerup nukittorsarneqarnissaa, Naalakkersuisut isumaqataaffigaat. 80 procentinilli anguniagaqarneq ilinniarfiit ilaanni ajornakusoortorujussuussaaq.
Ingerlaqqiffiusumik ilinniarfinni GUX-imilu ilinniartitsinermi ilinniartitsinissamut ingerlaqqiffiusumik ilinniagaqarsimanissaq piumasaqaataavoq, tamannalu ukiuni amerlasuuni ingerlattariaqartarpoq, sualummillu ingerlaqqiffiusumik ilinniareernermi suliffeqarfinnipiumaneqartaqigamik amerlaqisunik allanik periarfissinneqartarnerannut, Naalakkersuisut innersuussipput.
Taamaammat Naalakkersuisut allannguutissatut siunnersuuteqarput, tassani procentiliineq peerneqassalluni:
- Ilinniartitaanermi kalaallisut oqaatsit 80 %-imik atorneqalernissaannut ilinniarfiitilai annertungaatsiartumik killiffeqarput, illuatungaatigulli ilinniartitaanerni allani ilinniartitsisut kalaallit oqaasiinik atuisinnaasut ikinnerusarlutik. Ilinniarfiitilinniartitsinermi kalaallisut oqalussinnaasunik ikittuinnarnik ilinniartitsisullit, oqaatsitigut piginnaasalinnik ilinniartitsisussarsiorsinnaanerminnik akuttunngitsumik annertuumik ajornartorsiortinneqartarput. Ilinniartitaanerit tamakku ukiut quliinnaat ingerlaneranni 80 %-imik angusaqarnissaminnut ajornartorsiorsinnaapput, ilinniartitaanermut naalakkersuisoq Peter P. Olsen (IA) akissuteqaammini Inatsisartut nittartagaanni saqqummiunneqartumi taama allappoq.
Taarsiullugu ima oqaasertalerneqassaaq, ’ukiut qulit ingerlaneranni ilinniarfinni Ilisimatusarfimmilu ilinniartitsisut malunnaatilimmik amerlanerusut kalaallisut ilinniartitsisalernissaat anguniarlugu periarfissat suunerinik’ misissuisoqassaaq.