Naalakkersuisut nutaat erniinnaq saqqummiunneqassapput
Inuit Ataqatigiit aamma Siumut Naalakkersuisut akisussaaffiinik ullumi nal. 9.30 saqqummiussissapput, taamatullu naalakkersuisut isumaqatigiissutaannut ilassutitut isumaqatigiissummik aamma saqqummiussissallutik.
Inatsisartut ukiakkut ataatsimiinnerat tallimanngornermi 22. september aallartillugu, Mimi Karlsen (IA) peqqissutsimut naalakkersuisuujunnaarluni Inatsisartuni siulittaasunngorpoq, taamatullu Karl Tobiassen (S) aalisarnermut piniarnermullu naalakkersuisuujunnaarluni. Ulloq ulapaarfioqisoq qaangiussimatsiaannartoq, Naalakkersuisoqatigiinni partiit nutaanik naalakkersuisussanik saqqummiussinissaminnut piareerput.
Inuit Ataqatigiit aamma Siumut ataasinngornermi nal. 9.30 naalakkersuisoqarfiit agguataarnerat saqqummiutissavaat. Tamanna pissaaq tusagassiortunik katersortitsinikkut.
Isumaqatigiissummut ilassut
Inuit Ataqatigiit siulittaasuat, Múte B. Egede aamma Siumut siulittaasuat, Erik Jensen naalakkersuisoqatigiit isumaqatigiissutaannut atuuttumut isumaqatigiissummik ilassummik saqqummiussaqassasut, IA tusagassiortunik katersortitsinissamut aggersaanermini ilisimatitsivoq.
Erik Jensen Sermitsiaq.AG-mut ilisimatitsereernikuuvoq naalakkersuisoqatigiit isumaqatigiissutaannut ilassuteqarnissamik piumasaqarluni, tamannalu iluatsissimarpasippoq.
