Naalakkersuisut Nunatsinnilu Nakorsaaneqarfik marlunngornermi tusagassiortunik katersortitsilersut
Ullormi tusagassiortunik katersortitsinermi coronamut atatillugu killiffik sammineqassaaq.
Oqartussat corona pillugu marlunngornermi nalunaaqutaq ataatsimut tusagassiortunik katersortitseqqilerput.
Tusagassiortunik katersortitsinermi sunarpiaq sammineqarniarnersoq pillugu paasissutissat suli killeqarput, nunalli ilarujussuani coronavirusip tuniluunnerujussua tusagassiortunik katersortitsiniarnermi tunngaviuvoq.
Nunatsinni Nakorsaaneqarfimmit ataasinngornermi ilisimatitsissutigineqarpoq, napparsimasut tallimat Covid-19 pissutigalugu nunap napparsimmaviini uninngasut. Napparsimasut katillugit 15-it coronaviruseqartut paasineqarsimavoq, uninngasunillu 15-iusunit qulingiluat Covid-19 pissutigalugu Nuummi uninngallutik, Ilulissani marluk, Qaortumi marluk, Upernavimmi ataaseq Uummannamilu ataaseq aamma uninngallutik.
Tuniluuttoqangaatsiarneranut peqatigitillugu, sassaallertarfinnut killilersuutit marlunngornermi unnuap-qeqqanut atorunnaartussaapput.
Imigassamik inerteqquteqarneq aamma atorunnaassasoq
Killilersuutit malillugit sassaallertarfiit tamarmik unnukkut quliniit ullaakkut tallimat tungaanut matoqqasussaapput. Sassaallertarfinnut killilersuutit ingerlatiinnarneqassanersut tusagasiortunik katersortitsinermi Naalakkersuisut nalunaaruteqarnissaat naatsorsuutigineqarpoq.
Qeqqata Kommuniani aalakoornartortalinnik tuniniaaqqusinnginneq marlunngornermi unnukkut aamma atorunnaartussaavoq. Kommunip nammineerluni inerteqquteqarnissap atuutsinneqalernissaa qinnutigisimavaa, kommunimit kissaatigineqarsimammat aalakkuttarnerit sassaallertarfinnit angerlarsimaffinni nanginneqarsinnaanerisa coronallu tuniluunnerulersinnaanerata pinaveersaartinneqarnissaa.
Tusagassiortunik katersortitsinermi apeqqut alla saqqummiunneqarsinnaasoq tassaavoq, illoqarfinni nunaqarfinnilu aalajangersimasuni killilersuutaagallartut allanngortinneqassanersut.
Killilersuutit tunillaassuisutut ilisimaneqanngitsunit tunillaassuisoqarnerani atuutsinneqalertussanngorlugit suliarineqarsimapput, maannakkorpiarlu illoqarfinni nunaqarfinnilu arlalinni atuullutik. Misissuisarnermi nutaamik periuseqalernikkut ikinnerusunik misissuisoqartalermat, tunillaassuisutut ilisimaneqanngitsunit tunillaassuiffiusuni oqartussat malinnaajuminaatsitsinissaat naatsorsuutigineqarsinnaavoq.