Naalakkersuisut nunalerineq nersutaateqarnerlu annaanniaraat

Ukrainimi sorsuttoqarnera coronallu nunarsuaq tamakkerlugu ajornartorsiortitsinera pissutaallutik, Kujataani nuna­lerinermik nersutaateqarnermillu inuussutissarsiuteqarneq ukioq manna aningaasar­siornikkut sakkortuumik eqqornerlunneqarpoq, tamannalu taamatut inuussutissarsiuteqartut ilaasa akiilisinnaajunnaarlutik uniinnaratarsinnaanerannik kinguneqarpoq, aviisi Sermitsiaq allappoq.

Pissutsillu taamaannerat iliuuseqarfiginiarlugu naalakkersuisut suliniuteqannginnerarlugit, minnerunngitsumillu nunalerineq nersutaateqarnerlu pillugit naalakkersuisut ersarissumik anguniagaqannginnerarlugit, savaatillit, nersussuaatillit, Kommune Kujallermilu politikerit naalakkersuisunut piffissaq kingulleq sakkortuumik isornartorsiuipput.

Kisiannili nunalerineq nersutaateqarnerlu pillugit naalakkersuisut ersarissumik siu­niissamullu qulakkeerinnittussamik siunnerfeqarlutik anguniagaqartut – ukiullu ataatsip ingerlanerinnaani anguniakkat tamarmik piviusunngortinneqarsinnaanngitsut, nunalerinermut, imminut pilersornermut, nukissiuutinut avatangiisinullu naalakkersuisoq, Kalistat Lund, Inuit Ataqatigiit, oqarpoq.

Suliniutit pitsaasut

Maannakkutut ingerlajuartoqarsinnaanngitsoq, taamaattumillu nunalerinerup, savaateqarnerup nersussuaateqarnerullu suli maannakkornit annertunerusumik ineriartortinneqarnissaat pingaaruteqartoq, Kalistat Lund oqarpoq.

– Savat, savaaqqat nersussuillu neqaannik nunatta imminut pilersornerulernissaa ukiorparujussuarni anguniarneqarnikuuvoq, nunatsinnilu nunalerinerup uumasuuteqarnerullu inerisarneqarnissaanut, ta­mannalu aallaaviusussaavoq. Taamaattumik tamakkuupput uagut Naalakkersuisuni sulinitsinni aallaavigisagut, naalakkersuisoq oqarpoq.

Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq:

Sermitsiaq Uge 26 2022

Klik her for at læse