Naalakkersuisut Nukissiorfinni soraarsitsinissanik suliamik unitsitsigallartut
Nukissiuutileqatigiiffik pisariillisaaneq tunngavigalugu soraarsitsiortornissamik naluaaruteqarsimavoq - taamali pisoqassanngitsoq, Naalakkersuisut suliaq pillugu nassuiaaqqusisut oqarput.
Nukissiorfiit qanittukkut nalunaarutigaat, aggustip naanerani illoqarfinni 17-ini sullitat ornigullutik saaffiginnissinnaanerat unitsinneqassasoq.
Tassunga taarsiullugu sullitat digitalikkut imminnut sullittassapput, Nukissiorfiillu Sermitsiaq.AG-mut oqaluttuarivaat, digitaliseeriinikkut ukiumut inuit 13-it suliassaannik sipaaruteqartoqassasoq.
Naalakkersuisulli tamanna unitsikkallarpaat.
Naalakkersuisut pilersaarutaasutut sullitanut digitaliusumik aaqqissuussiniarnerup kingunerisaanik Nukissiorfinnut piumasarisimavaat allaffissornikkut sulisunik soraarsitsinissap qanoq ingerlanneqarsimanera pillugu nassuiaasiortoqassasoq,
Nukissiorfiillu tamatumunnga atatillugu soraarsitsinissanik suliat unitsikkallassagaat Naalakkersuisut piumasarisimavaat. Nukissiuuteqarnermut Naalakkersuisoq Steen Lynge tusagassiorfinnut nalunaaruteqarnermi ilisimatitsivoq.
Soraarsitsiortornerit ajuusaarnartut
Steen Lyngep aappaatigut Nukissiorfiit pisariillisaaniarnerat pitsaasuunerarpaa:
- ”Naalakkersuisut atuisartunut erngup kiassarnerullu sapinngisamik akikitsuunissai qularnaarneqarnissaat assut pingaartippaat. Taamaattumik Nukissiorfiit eqeersimaartumik suliniutigimmassuk anguniagaq taanna iluarisimaarnarpoq, Steen Lynge oqarpoq.
Steen Lyngelli aappaatigut, suisunik soraarsitsiortornissaq aamma ajuusaarnartuunerarpaa:
- Ajuusaarnarporli tamanna soraarsitsinernik kinguneqartussatut isikkoqarmat. Taamaattumik Naalakkersuisut sinnerlugit Nukissiorfiit qinnuigisimavakka nassuiaateqarfigissagaat suliap tamatuma qanoq ingerlanneqarsimanera, atorfeqartitsinermut atatillugu atugassarititaasut tamarmik eqqortumik ingerlanissaat qularnaarumallugu.
Sermitsiaq.AG-mit Steen Lyngep apersorneqarnissaa sulissutigineqarpoq, ilaatigut Nukissiorfiit atorfeqartitsinermut atugassarititaasunik malinninnersut Naalakkersuisunit sooq tutsuigineqannginnesoq nassuiaatinniarlugu.