Naalakkersuisut Nukissiorfiit pillugit isumaqatigiinngittut
Nukissiorfiit sullitaminnik kiffartuussisarnermik pisariillisaaniarminnut atatillugu sulisunik 13-inik soraarsitsiniarnerannut Naalakkersuisut akerliunianngitsut saqqummiunneqarmat, Naalakkersuisooqataasoq sakkortuumik isornartorsiuivoq.
Steen Lyngep ingerlatseqatigiiffiup Namminersorlutik Oqartussanit pigineqartup Nukissiorfiit soraarsitsiniarnermut tunngatillugu aalajangiinera, ingerlatseqatigiiffiullu siulersuisuisa suliamik tamarmiusumik isumaginnissimaneri Aningaasaqarnermut Naalakkersuisup Vittus Qujaukitsup (QN) sakkortuumik isornartorsiorpai.
- Suliffeqarfiup tunngavilersuutai atorsinnaanngillat, taanna Sermitsiaq.AG-mut oqarpoq.
Vittus Qujaukitsoq erseqqissaalluni oqarpoq, Nukissiorfiit allatigut 4,5 millioner koruuninik sipaarniuteqarsinnaasut.
- Namminersorlutik Oqartussat sipaaruteqartoqarnissaanik piumasaqaateqarnerat sulisunik soraarsitsiortornermut atornagu allanik salliutitsinikkut pissaaq, Naalakkesuisoq oqarpoq.
Nukissiorfiit aningaasaateqartut
Naalakkersuisup taamatut oqarnerminut tunngavigai, suliffeqarfik sanaartugassanut 2,7 milliarder koruuninik uninngasuuteqartoq, ukiumut 850 millioner koruuninik kaaviaartitsisartoq kiisalu 1,4 milliarder koruuninik nammineq aningaasaateqartoq.
Sineriammi sullitanik kiffartuussinermit aningaasat sipaarutiginiakkat pissarsiarineqartussaanngillat, politkkeri erseqqissaavoq.
Taanna isumaqarpoq, Nukissiorfiit siulersuisuisa inuiaqatigiinnut pisussaaffeqarnertik eqqarsaatiginngikkaat avatangiisiminnilu susoqarneqaranik malinnaanngitsut.
- Eqqaamaneqassaaq innuttaasut tamarmik digitalimut attaveqanngimmata, taamaammallu digitaliseeriineq taakkununnga isumaqanngittoq, sulisummi soraarsitaaniartut sullitat oqarasuaateqannginnertik internitseqannginnertsillu pissutigalugu takkullutik kiffartuunneqarnissaannut issiasuupput, taanna oqarpoq.
- Innuttaasut qanimut tikillugit kiffartuunneqartarnerat atorunnaassaaq, periuserineqartorlu akuersaarnqarsinnaanngilaq, suliaq taamaammat Naalakkesuisunut politikkikkut kinguneqartussaavoq, taanna oqarpoq.
Pilersaarusiorneq pitsaanerusoq politikkikkullu akisussaaneq
Taanna naapertorlugu soraarsitsiniarnermut tunngatillugu piffissami sivisunerusumi pilersaarusiortoqarsimasussaangaluartoq, aamma pilersaarutigineqartoq aallaqqaammulli politikkikkut akuerineqartussanngortinneqartussaangaluartoq.
- Digitatiliseeriiniarneq tunngavigalugu pisariillisaanermi tunngaviusariaqarpoq sulisut piginnittullu piffissaalluartillugu suliarineqatup imaanik oqariartuutaanillu paasinnissimanissaat. Tulliullugu tamanna politikkikkut aalajangiinermik tunngaveqartariaqarpoq, tassani Naalakkersuisut suliamut atatillugu isummertinneqartariaqarlutik. Tamannalu pisimanngilaq, Vittus Qujaukitsoq oqarpoq.