Mimi Karlsen (IA) Inatsisartuni siulittaasunngorpoq. Taassuma peqqissutsimut naalakkersuisutut tunuarnerata kingorna Agathe Fontain (IA)-p paarlappaa.

Stine Egede (IA) Inatsisartunit tunuavinnissaminik noqqaassuteqarpoq, taanna Kommune Kujallermi borgmesterinngoramili Inatsisartuni ilaasortatut sulinngiffeqarnikuuvoq. Stinep tunuarneratigut Hans Aronsen (IA) Inatsisartuni ilaasortavittut inissippoq.

Taamaattorli Hans Aronsen (IA) napparsimalluni sulinngiffeqarmat Mariia Simonsen (IA) naalakkersuisut nikinneranni, Mimi Karlsen-imut sinnissutut Inatsisartuneereerluni tunuaqqammertoq aggersarneqarpoq, Hans Aronsen-ip napparsimanerani suliaanik ingerlatsissalluni.

Karl Tobiassen (S) aalisarnermut piniarnermullu naalakkersuisutut tunuaqqammerpoq, maannalu Inatsisartuni ilaasortatut utersimalereerluni, taanna paarlallugu Kim Kielsen (S) naalakkersuisuuffigisimasaani naalakkersuisunngorpoq.

Siumup siulittaasua, Erik Jensen, aningaasaqarnermut akileraartarnermullu naalakkersuisunngorpoq, parteeqataalu Hans Peter Poulsen naalakkersuisuuffigisimasaanut inissilluni, tassa ineqarnermut attaveqaqatigiinnermullu naalakkersuisunngorluni.

Taakku nikinnerannut atatillugu sinniisussaq Najaaraq Møller (S) Inatsisartuni ilaasortatut aggersagaaqqippoq.

Maluginiarnarpoq, Siumut sinniisussanik aggersaanerminut atatillugu sinniisussatut tulleriaattut ammungaatsiaq killiffigigai, taamaalilluni Siumut sinniisussamik aggersaanissaminik pisariaqartitsilissagaluarpat, taava Henrik Fleischer aggersagassani tullinnguuttutut inissisimavoq, ilisimaneqartutulli taanna nammineq partiiliornikuuvoq.

Pipaluk Lynge (IA) Inatsisartunut uterpoq

Naalakkersuisut nikinnerisa kingunerisaanik Inatsisartuni issiaviit arlallit inuttassarsineqartussanngornikuupput. Tassunga tunngatillugu IA-mit Pipaluk Lynge Inatsisartunut aaneqaqqippoq.

Taanna sinniisussatut Inatsisartuni ilaasortanngorpoq Inatsisartunut qinersinerup kingorna IA ajugaammat. Taamaattorli august 2022-mi aalajangerpoq sulinngiffeqarnissaminik qinnuteqassalluni, aningaasaateqarfimmi WWF-mi suliniutinut pisortatut sulilernerminut atatillugu. Maannali tassa Inatsisartunut uterpoq.

Siverth K. Heilmann (A) napparsimalluni sulinngiffeqarpoq

Naalakkersuisooqatigiit partiivisa Inatsisartuni nikinnerat kisimi pinngilaq. Siverth K. Heilmann napparsimanerminut atatillugu sulinngiffeqarpoq, Atassutillu sinniisussaasa siullersaat Bentiaraq Ottosen (A) Inatsisartunut aggersarneqarpoq.

Demokraatit sinnerlugit Inatsisartuni ilaasortaq Anna Wangenheim erninerminut atatillugu suli sulinngiffeqarpoq, taamaammallu Bjørk Lange Olsen (D) Annallu piareernissaata tungaanut suliaanik sinniisutut suli isumaginnippoq.

Pingasunngornermi kingusinnerusukkut Inatsisartut ataatsimiititalianut agguaatissapput.