Naalakkersuisut: Naqinnernik ilisarinnissinnaanngitsut misilitsittarnissaat pingaaruteqarpoq

Sanasunngorniaq Sisimiuneersoq Krister Støvlbæk ilinniarnini naammassilerpaa. Naqinnernik ilisarinnissinnaanngitsuuvoq. Tamannali misilitsinnissaminut uniffigiinnanngilaa. Misilitsinnermi atugassai ilinniartitsisuata Vittus Karlsenip iPadi atorlugu immiuppai.

Naqinnernik ilisarinnissinnaanngitsut atuffarluttulluunniit misilitsinnermi kisimiisinneqartarnerat Vittus Karlsenip akerliuffigaa. Maannakkullu atortorissaarutit atorlugit misilitsittoqarsinnaanera atorluarneqarpoq. Krister Støvlbækip misilitsinnerit pingasut angusiffigereerpai, naggataarutaasumillu misilitsinnissani kisimi amigaatigalugu.

- Ilinniarfiit allat malinnaanissaat sulissutigissavara, taamaalilluni inuiaqatigiit assigiinngissutsinik akuersaarnermillu inissaqartitsisut ataatsimoorluta siuarsarniassagatsigit, ilinniartitaanermut, kultureqarnermut, ilagaaqarnermut naligiissitaanermullu naalakkersuisoq Siumumeersoq Nick Nielsen oqarpoq.

Naalakkersuisut kikkut tamarmik peqataatinneqarnissaat kissaatigaa.

- Taamaammat ilinniarfitsinni peqataatitsinermi siunertaavoq innuttaasut isumaqartumik peqataatinneqarnermikkut peqataanermikkullu inuiaqatigiit inuuneranni peqataanissamut periarfissaqarnissaat. Allatut oqaatigalugu inuit tapersiivissamut nuutsinnagit tapersiineq inunnut nuutsissavarput. Akerlianik kikkut tamarmik qanorluunniit iliorluni peqataatinneqarnissaat pineqanngilaq, Nick Nielsen oqarpoq, nangillunilu:

- ynscenter Refsnæsip suleqataasalu atortoq kalaallisut oqaasertaliisinnaasoq – allakkanik oqaasinngortitsisinnaasoq naammassingajalerpaat. Ilimagineqarpoq qarasaasiakkut atortorissaarut ukiamut avammut saqqummiunneqassasoq, neriuutigaaralu inuit amerlanerusut atuarnermik allannermillu ajornartorsiuteqartut ulluinnarni ajornannginnerusumik inuuneqalernissaannut ikiuutaassasoq, tamannalu aqqutigalugu inuunermi inuttut anguniakkat amerlanerusut piviusunngortinnissaannut periarfissinneqassasut.