Naalakkersuisut napparsimallutik sulinngiffeqarnerat ernummatigineqartoq
Naalakkersuisunut ilaasortat marluk napparsimallutik sulinngiffeqarput, tamannalu IA-mi ernumassutigineqarpoq, kisianni aamma Naalakkersuisut siulittaasuata Kim Kielsenip isumaliutersuuteqarfigaa.
IA-meersup Múte B. Egedep ullumikkut akunneq apeqquteqarfiusumi, Kim Kielsenip qitiuffigisaani, Simon Simonsenip aamma Siverth K. Heilmannip napparsimallutik sulinngiffeqarnerat sammivai.
Killeqarpa?
- Naalakkersuisut sinnerisa saniatigut suliassat qanoq sivisutigisumik nammassinnaavaat? Naalakkersuisunik nutaanik toqqaasoqarsinnaaneranut killiliisoqarpa, Múte B. Egede aperivoq.
Naalakkersuisunut ilaasortanut taakkununnga naalakkersuisuuffinnik tigusisunut saniatigut suliassaqartitsisoq Kim Kielsenip nassuerutigaa.
- Innuttaasut kiffartuunneqarnerinut tunngatillugu nikittoqanngilaq. Ilaat soorunami saniatigut artukkerneqarput, kisianni suliassat suliarineqarput, Kim Kielsen oqarpoq.
Isumaliutersuuteqarnerit
- Ilaasortatsinnik napparsimalluni sulinngiffeqartunik aatsaat naammattuuinngilagut. Soorunami isumaliutersuuteqarpugut. Sivitsussagaluarpat isumaliutersuuteqarfigaarput. Apeqqutaavoq qulingiluaarnerput nangissaneripput, imaluunniit ilaasortat arfineq-marluk naammannersut, Kim Kielsen oqarpoq, ilaasortat taakku marluk sulinngiffeqarnertik sivitsussallugu kissaateqarsimanersut oqaatiginngilaa.