aalisarnermut inatsit
Naalakkersuisut nalunaarutip akerlianik iliortut
Aalisarnermut inatsisissaq nalunaarummi oqallisaaqisumi innersuussutigineqartut akerlianik siunertaqarpoq. Nalunaarut Kalaallit Nunaanni Naatsorsueqqissaartarfiata aalisarnermi aningaasarsiornermik ilisimasalimmut imissutigaa. Allannguutit sivikitsuinnarmik iluaqutaassapput, allaaserinnittoq oqarpoq.
Naalakkersuisut aalisarnermut inatsisissatut siunnersuumminni kinguppanniarnermi aningaasaqarnermut tunngaviusut killorluinnaanik iliorput.
Aviisi AG taama allappoq.
Taama aalisarnermi aningaasaqarnermik ilisimasalik, Max Nielsen, oqarpoq. Taanna AG-p upernaaq apriilimi eqqaasaanik Kalaallit Nunaanni Naatsorsueqqissaartarfiup inniminnigaanik kalaallit aalisakkanik tunisassiorneranni naleqartitat pillugit sukumiilluinnartumik misissuinermik allagaqartuuvoq.
Sivikinnerusumut isigaluni pilersitsisinnaasoq
- Sivikinnerusoq isigalugu suliffissanik pilersitsilaarsinnaavoq tamannalumi pingaaruteqarsinnaalluni. Ungasinnerusorli isigissagaanni aningaasaqarnermik, kinguppaat tunisat nalingisa ilapittuutaanerannut aamma kinguppannut akitsuutiniy isertitanik ajornerulersitsissasoq aalisarnermik aningaasaqarnermut ilisimasalik oqarpoq.
Ukiumi matumani siusinnerusukkut misissuinerata inernera erseqqippoq: Kinguppattassiissutit atugarissaanermut sapinngisamik annerpaamik tunniussissappata kinguppanniartut ikitsunnguutittariaqarput, avaataasiortut sinerissallu qanittuani aalisartut killeqartikkunnaartariaqarput amerlanerpaallu qalipaajarnagit avammut tunineqartariaqarlutik. Kinguppaammi qalipallit iluanaarnarnerupput.
Tamanna Kalaallit Nunaanni suliffissanik 430-nik akeqassaaq, kisianni sulinngitsoq ataaseq uuttuusiullugu millionit koruunit ataatsit missaannik isertitsissutaanerussalluni.
Periusissaq killormorluinnaq
Naalakkersuisulli siunnersuutaanni periusissaq killormorluinnaq pisoq atorneqarpoq. Naalakkersuisummi kinguppanniarnermit suliffissaqartitsinissaq qulakkeerusuppaat aalisariutillu annernit kinguppattassaat suliffissuarnut ingerlateqqillugit.
Sinerissamut qanittumi aalisarnermi pisassat ullumikkut 43 procentiusut 50 procentiunissaat inatsisitigut piumasaqaataassaaq. Aamma killiligaanngitsumik akuersissutit ukiunik tallimanik sioqqutsilluni nalunaarnikkut utertinneqarsinnaassapput.
Aningaasarsiornermik ilisimasallip apersorneqarnera tamaat AG-mi atuaruk, taanna uani ataani digitaliusumik atuarsinnaavat.