Ilinniarneq
Naalakkersuisut meeqqat atuarfiannut anguniagaat Dorisip saqqummiuppai
Siunnissami ilinniartitaanerup aaqqissuussaanissaa ilinniartitaanermut naalakkersuisumit, Doris J. Jensenimit (S) saqqummiunneqarput.
Ilinniartitaanermut naalakkersuisup, Doris J. Jensenip (S), Naalakkersuisut siunissami meeqqat atuarfiannut anguniagaat saqqummiuppai. Inuusuttut inuusuttut ilinniagaannik naammassinnittartut amerlatsinnissaat anguniarneqarpoq.
Tassani ilinniarfeqarfiit qaninnerusumik suleqatigiissapput, tassami meeqqat atuarfianni 8. klassimik naammassinnittut sulerinissartik ilisimariissammassuk.
Tunngaviusumik atuarfik, 1. klassimit 8. klassimut nunaqarfinni illoqarfinniluunniit ingerlanneqartassaaq. Kingornalu meeqqat nunaqarfimmeersut 8. klassimit soraarummeernissap tungaanut illoqarfiliartassapput.
8. klassip kingorna meeqqat aalajangertassavaa ilinniarnertuunngorniarfimmi imaluunniit inuussutissarsiornermut tunngasumik ilinniassanerlutik. Ilinniarnertuunngorniarniat ilinniarnertuunngorniarfimmi atualinnginnerminni ukiut marluk atuartassapput, inuussutissarsiornermut tunngasumik ilinniagaqarniartut ukiuni sisamani atuaqqaartassallutik, tassa 9. klassimit 12. klassip tungaanut.
Ilinniarnertuunngorniarnermut aamma inuussutissarsiornermut ilinniarnermut tunngasut, 9. aamma 10. klassimi meeqqat atuarfianni illoqarfinnut campuseqarfiusunut (Ilulissat, Aasiaat, Sisimiut, Nuuk aamma Qaqortoq) ingerlaqqittoqartassaaq.
Aaqqissuusseqqinnerup sannaa suliarineqarpoq, tamannalu ukiuni marlunni pissaaq. Inatsisitigut allannguutit 2020-mi Inatsisartut ataatsimiinneranni suliarineqarsinnaanissaat, Naalakkersuisut anguniagaraat.