Naalakkersuisut matoqqanerat Randip isornartorsiorpaa
Upernaakkut Ataatsimiinnissaq sioqqullugu Naalakkersuisut inatsisinik piareersaallutik sulinerat, Demokraatit gruppimi siulittaasuata Randi Vestergaard Evaldsenip isornartorsiorpaa.
Naalakkersuisoqatigiit siuttuunerat Demokraatinit taperserneqarnermit pissuteqarpoq, tamannalu illuatungiliuttunit uggorineqarpoq, kisianni Demokraatit aamma Naalakkersuisut akornanni suleqatigiinneq – imaluunniit suleqatigiinnermik amigaateqarneq – maanna isornartorsiorneqarpoq.
- Gruppimi siulittaasutut aamma naalakkersuisoqatigiit siuttuuginnarnissaannut Inatsisartuni taasinernik pisariaqartinneqartunik tigummiartutut, Upernaakkut Ataatsimiinnissaq sioqqullugu Nalaakkkersuisut inatsisissatut siunnersuutit saqqummiussaat pillugit ataasinnguamilluunniit ilisimatinneqarsimannginnerput tupigusuutigisorujussuuara, Randi Vestergaard Evaldsen, Demokraatit, Sermitsiaq.AG-mut taama oqarpoq.
Politikkikkut suliniutit naalakkersuisoqatigiit aamma Demokraatit akornanni akerleriissutigisinnaasaat pillugit sooq Demokraatit ilisimatinneqarsimanngitsut, taassuma paasisinnaanngilluinnarpaa, tamatumami Naalakkersuisut tatiginassusaat aamma partiip tapertaasup suleqatiginerat nukilaallisissammagu.
- Imigassaq pillugu inatsimmi allannguutit sivisuumik suliarineqareerlutik maanna piumasaqaatitsinnut naapertuutilernerat naammagisimaarinnilluta maluginiarparaput, tassani ammasarfiit allanngortinneqarput, pilerisaarinermut inerteqqut aamma assiaqusersuinerit atorunnaarsinneqarput, Demokraatit siulittaasorisimasaat oqarpoq.
Akerleriinneq
- Naalakkersuisut tusarniaanermut ingerlanneqartumut piumasaqaatitsinnut tusarnaarusussimagaluarpata akerleriinneq pinngitsoortissimasinnaagaluarparput, Randi Vestergaard Evaldsen oqarpoq.
Naalakkersuisut upernaakkut ataatsimiinnissamut inatsisissatut siunnersuuterpassuit saqqummiussaat partiianit suli atuaqqissaarneqarsimanngitsut, taanna ilisimatitsivoq, ilisimatitsinnginnerlu pissutigalugu – siunnersuutit ilaannut Demokraatit itigartitsillutillu tapersiinngitsoortariaqassasut ilimagaa.
- Uanga isinnit tamanna sullarinnerunngilaq, Demokraatit gruppimi siulittaasuat taama isornartorsiuvoq.
Aaqqissuusseqqinnissat ilaannut piareersarneqartunut partiit allat assigalugit ilanngunneqarput, tamannalu pitsaasuuvoq, kisianni inatsisinik piareersaalluni sulinermut tunngatillugu periutsimi allanngortoqanngilaq.