Naalakkersuisut marluk isornartorsiorneqartut: Peter tunuartoq – Aqqaluaq annaanneqarpoq
Peter Olsen nammineerluni tunuarniarluni aalajangersimasoq, Múte B. Egedep naqissuserpaa, taamaattumillu Demokraatit tatiginnikkunnaarnermik taasitsiniarneranni marlunngornermi taasititsisoqanngilaq. Akerlianik pingasunngornermi Aqqaluaq B. Egede pillugu taasititsisoqarpoq, taanna suli Naalakkersuisunut ilaavoq.
Ulluni kingullerni upernaakkut ataatsimiinneq naalakkersuisoqatigiit isaannit nuannerpallaanngitsunik pisoqarfiusorujussuuvoq. Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, tatiginnikkunnaarnermik taasititsisoqarnerata kingorna ippassaq tunuartariaqarpoq.
Ullumikkut suleqataanut Aqqaluaq B. Egedemut tatiginnikkunnaarnermik taasititsisoqarpoq, taassuma aatsitassanut inatsit nutaaq ataatsimiinnermi akuerineqarnissaa ilungersuutigaa. Kingulleq Siumumit aamma IA-mit itigartinneqarpoq.
Naalakkersuisoqatigiillu Peter Olsenimut marlunngornermi taamaaliorsimasinnaagaluarput, taamaattoqanngilarli.
Peter Olsenimut tatiginnikkunnaarnermik taasititsinermi akerlianik siunnersuuteqartoqanngitsoq, Múte B. Egedep pingasunngornermi ataatsimiinnerup nalunaaqutaq 11 aallartinnerani Sermitsiaq.AG-mut oqaatigaa.
- Tatiginnikkunnaarnermik taasititsineq ippassaq takkuttoq, tamatumalu kingorna pisup, Peter Olsenip tunuarniarluni aalajangerneranik kinguneqarpoq. Tamanna tusaatissatut tiguara suliarissallugulu.
Naalakkersuisut atasinnaasut piumagai
Naalakkersuisunilu taarsiisariaqalernini siulittaasup uggoraa.
- Taamaaliorusunngikkaluarpunga. Naalakkersuisut atasinnaasut piumavakka, kisianni Inatsisartut tatiginnikkunnaarsimappata aamma naalakkersuisoq tunuartariaqarluni aalajangerpat taamaattariaqasssaaq.
Peter Olsenip tunuarnerata suleqatigiit ataatsimut qanoq sunnissanerai, aamma atorfimmut inuttaqarunnartumut kina kingoraartaassanersoq suli aalajangerneqanngilaq.
- Naalakkersuisuni siulittaasutut ataqatigiissitsinissaq pisussaaffigaara. Suliara naammassippat Naalakkersuisut qanoq katiterneqassanersut piaarnerpaamik nalunaarutigissavara.
