Inatsisartuni ilaasortap Marianne Paviassenip paragraf 37 naapertorlugu Naalakkersuisunut apeqqutigisimavaaa, Kuannersuarni aatsitassarsiorniarnermut atatillugu tusarniaanerup killiffia.

Aatsitassanut Naalakkersuisup Naaja Nathanielsenip (IA) akissuteqaammini ilisimatitsissutigaa, Kuannersuarni Greenland Mineralsip suliassaa Aatsitassanut ikummatissanullu inatsit aammalu atugassarititaasut immikkut ittut ingerlatseqatigiiffimmut piumasarineqartut naapertorlugit suliarineqartussaasoq.

- Naalakkersuisut inatsisit atuuttut malillugit sulipput aammalu atugassarititaasut aatsitassarsiorluni misissuinissamut akuersissummi aalajangersagaasut malillugit. Ingiaqatigisaanik inatsisip aamma aatsitassarsiorluni misissuinissamut akuersissutip killissaasa iluanni uranimik piiaanissap - aamma Kuannersuarni suliassami - pinngitsoortinnissaanut periarfissat suunersut Naalakkersuisut nalilersuleruttorpaat.

Innuttaasut ataatsimeeqatigineqaqqissasut

Naaja Nathanielsenip aamma ilisimatitsissutigaa, Kujataani tusarniaalluni ataatsimiitsinerit sapaatip akunnerani 34-mi aamma/imaluunniit 35-mi ingerlanneqarnissaat pilersaarutigineqartoq.

Tassa Greenland Mineralsip Aatsitassanut ikummatissanullu inatsit naapertorlugu piiaanissamut qinnuteqaatiminnut atatillugu tamanut ammasumik tusarniaanerup ingerlanneqarnissaa pisinnaatitaaffigimmagu, taassumalu naammassineqarnissaanut Naalakkersuisut peqataaniarput, piaanissamut akuersissuteqartoqassanersoq pillugu aalajangiisoqartinnagu, akissuteqaammi allassimavoq.

- Tusarniaanerup ingerlanerata unitsinnissaa Naalakkersuisut kissaatigissagaluarpassulluunniit, maannakkut inatsimmi killissaliussat iluanni tamanna ajornarpoq, Naalakkesuisoq erseqqissaavoq.

Tusarniaaneq naammasineqartinnagu aalajangiisoqassanngitsoq

VVM aamma VSB pillugit Greenland Mineralsip nassuiaammini saqqummiussimataatut piiaanissaq pilersaarutaagaluartoq, Kuannersuarni uranimik piiaasoqassanngitsoq IA qineqqusaarnermi neriorsuisimagaluartoq, suli inaarutaasumik aalajangiisoqarsimanngilaq. Tassa pisortatigoortumik.

Februaarip qaamataani tusarniaalluni ataatsimiisitsinernut qunusaarisoqarsimaneq pissutigalugu politikkerinik peqataasoqarsimanngilaq.

- Tamanna Naalakkersuisut iluarserusuppaat, tassami aatsitassanut ikummatissanullu inatsit malillugu tusarniaalluni ataatsimiititsinerni politikerinik peqataasoqarnissaa pingaaruteqartorujussuartut isigineqarmat, Naaja Nathanielsen allappoq.

Mariane Paviasenip apeqquteqaammini paaserusussimavaa, Kuannersuarni aatsitassarsiorniarnerup unitsinneqarnissaa naatsorsuutigineqassanersoq.

- Aatsitassanik pinngoqqaatinillu qinngornernik ulorianartunik akulinnik Kalaallit Nunaanni piiaanissap unitsinnissaa Naalakkersuisut kissaatigaat. Tassani aamma Kuannersuarni aatsitassarsiorfissaq pineqarpoq. Kuannersuarni aatsitassarsiorfissaq pillugu ajornartorsiut ataasiakkaatigut qanoq iliuuseqarfigineqassanersoq, sunik periarfissaqarnersugut misissuinermi Naalakkersuisut qanoq inerniliissanersut apeqqutaassaaq.