Naalakkersuisut Kommuneqarfik Sermersooq kommunit Nakkutilliisoqarfianut suliassanngortippaat
Namminersorlutik Oqartussat Kommuneqarfik Sermersuullu saqitsaassuteqarnerat kommunit Nakkutilliisoqarfianut suliassanngortinneqarpoq.
Namminersorlutik Oqartussanit nalornissutigineqarpoq, Kommuneqarfik Sermersooq Nuummi inissanik pissarsisiniarnermi inatsisit naapertorlugit iliuuseqarsimanersoq.
Namminersorlutik Oqartussat taamaammat kommunimi nakkutilliillutik aallartissimapput, nakkutilliisuusulli Nunamut Namminermut Immikkoortortaqarfiup paasissutissat pisariaqartinneqartut kommunimit pissarsiarisinnaannginnerarpai.
Naalakkersuisut taamaammat aalajangersimapput, suliaq Kommuni Nakkutilliisoqarfianut suliassanngortinneqassasoq, Naalakkersuisut oktobarip arfineq-pingajuanni ataatsimiissimaneranni imaqarniliami tamanna atuarneqarsinnaavoq.
Inissiat innuttaasunut attartortissimagai
Suliami pineqartoq tassaavoq, Kommuneqarfik Sermersuup Nuummi inissiat 300-t missaannittut sanasunit namminersortunit attartorsimagai, kommunillu inissiaatileqatigiiffiutaa Iserit aqqutigalugu inissianik attartortitseqqissimanera.
Kommuni naapertorlugu illoqarfiit pingaarnersaanni inissaaleqinerujussuaq aaqqiiffiginiarneqaannarpoq.
Kommunit Nakkutilliisoqarfiat tallimanik ilaasortaqarpoq, Savalimmiunilu ombudsmandi Sólja í Ólavstovu siulittaasuulluni.