Naalakkersuisut KNR-mut aningaasaliissuteqarniarnermi paatsiveerussimaartut

KNR apriilip qaammataani Inatsisartunut qinersinerup aallakaatinneqarnissaanut atatillugu Naalakkersuisunut immikkut 900.000 koruuninik qinnuteqarsimavoq. Qinnuteqaalli Inatsisartut aningaasaqarnermut ataatsimiititaliaanit itigartinneqarsimavoq. Ataatsimiititaliaq suliaq pillugu aalajangiinermini arlalinnik apeqquteqarsimavoq.

Ataatsimiititaliamit oqaatigineqarpoq, aningaasat annertussusissaat naammaginartumik tunngavilersorneqarsimanngitsut, KNR-llu itisiliinissaa kissaatigineqarsimalluni. Ataatsimiititaliamit qinnuteqaatip aggustip naanerani aatsaat tiguneqarsimanera tupigusuutigineqarpoq. Piffissaanngitsukkut qinersisoqarnissaanik nalunaaruteqartoqarsimanngitsuuppat, aatsaat 2022-mi qinersisoqartussaagaluarpoq.

Ataatsimiititaliamit paaserusunneqarsimavoq. KNR qinersinermik aallakaatitsinissamut qaqukkut aningaasanik immikkoortitsisarnersoq, aamma paaserusunneqarsimavoq immikkut ittumik qinersinerup ilutigisaanik kommunalbestyrelsinut inersisoqarnerani KNR-p aallakaatitsineranut missingersuutitigut iluaqutissarsiffiusimannginnersoq.

KNR-p aningaasat maajimi pissarsiarisimagai

Karl Henrik Simonsenip Sermitsiaq.AG-mut nassuiaatigaa, KNR-mit aningaasat pissarsiarineqareersimasut.

2021-mi kommuninut Inatsisartunullu qinersisoqareersoq faktura 903.692,23 koruuninik aningaasartalik 2021-mi apriilip 27-ani Nunamut Namminersmut Naalakkersuisoqarfimmut nassiunneqarpoq, ilisimatinneqarsimagatta faktura taakkununnga nassiunneqassasoq. Aningaasat Inatsisartunut qinersisoqarnerata taamaallaat aallakaatinneqarneranut atorneqartussaasimapput.

Nunamut namminermut immikkoortortaqarfiup 2021-mi apriilip 28-ani akissuteqalruni ilisimatitsissutigaa, qinersinermut immikkut ittumik aningaasartuutit namminneq akilertussaanagit. Taakkulu Ilinniartitaanermut, Kultureqarnermut Ilageeqarnermullu Naalakkersuisoqarfimmut innersuussipput, 2021-mi apriilip 29-ani taakkununnga saaffiginnippugut.

2021-mi maajip aqqarnani naalakkersuisoqarfiup saaffigaatigut oqarfigalutalu aningaasaqarnermut naalakkersuisoqarfiup qinersinermut aningaasartuutinut akiliuteqarsimanera kukkusuusoq, oqaatigalugulu Ilinniartitaanermut, Kultureqarnermut Ilageeqarnermullu Naalakkersuisoqarfimut ilassutitut aningaasaliiffigineqarnissamik qinnuteqartoqartussaasoq, taakkulu suliamik ingerlatsilereersimasut.

Pisortaaneq tamatuma kingornatigut aalajangiisoqarnissaanik nukingisaarisarsimavoq, maannamummili nutaanik tusagaqarsimannginnerarluni.

- Tamatuma kinguneranik allatigut aningaasanik sipaaruteqartariaqarsimavugut, soorlu avataanit tv-kkut aallakaatitassianik pisiaqartarnermut sipaaruteqarsimalluta, tv-kkummi nalunaaquttap akunnerini aalajangersimasuni aallakaatitsisarnissaq eqqarsaatigalugu kiffartuussinissamut isumaqatigiissut malissinnaajumallugu. Aningaasat pissarsiarinngikkutsigit kiffartuussinissamut isumaqatigiissut malissinnaanngilarput, aningaasammi én million koruuningajalluinnaat amigaatigingutsigit isumaqatigiissut naammassisinnaanngilarput. Karl-Henrik Simornsen erseqqissaavoq.

Pisortaanerup Sermitsiaq.AG-mit aatsaat saaffigineqarami ataatsimiititaliaq aalajangiussaqarsimasoq aatsaat paasisimavaa.

Nalinginnaasumik qinersisoqarnissaanut aningaasat immikkoortinneqartartut

Karl-Henrik Simonsenip missingersuutinut tunngaillugit nassuiaatigaa, 2021-mi kommunimut qinersisoqarnissaanut aningaasat immikkoortinneqarsimasut, aamma pilersaarutit malillugit 2022-mi Inatsisartunut qinersisoqartussaagaluarmat, decembarip qaammataani aningaasat Inatsisartunut qinersisoqarnissaanut immikkoortinneqartussaasimasut.

- Piffissaanngitsukkulli qinersisoqarmat, nunami sumiiffinni assigiinngitsuni qineqqusaartoqarneranut aningaasartuutissat missingersuusiorsimanngilagut. Ileqquugaluarpoq piffissaanngitsikkut qinersisoqartussaatillugu ilassutitut aningaasaliiffigineqartarnerput.

Ataatsikkut assigiinngitsunut qinersisoqarnerata sunniutigisinnaasai eqqarsaatigalugit KNR-p suut iluaqutaallutillu ajoqutaasinnaaneri eqqarsaasersuutigisimavai.

- Ataatsikkut qinersinerit taakku marluk aallakaatinneqarnissaat isumatusaarnerussanngitsoq isumaqarsimavugut. Qineqqusaarluni angalanissat partiit peqatigalugit pilersaarusiorneqarsimapput, 2021-milu aalajangiunneqarpoq, kommunimut qinersinerit Inatsisartunullu qinersineq immikkoortillugit aallakaatinneqassasut, tassa kommunalpolitikkip nunamullu tamarmut politikkip akulerussuullugit oqallittoqarnissaa pinngitsoortinniarlugu.