Naalakkersuisut kinguaattooqqanerujussuaq pillugu nassuiaammik suli utaqqimaarput
Nuna tamakkerlugu pilersaarusiamut nassuiaat, Naalakkersuisut pisortat inissiaataasa attaveqaasersuutillu aserfallatsaalineqarnissaannik kinguaattooqqanerujussuup qanoq iliuuseqarfigineqarnissaa pillugu politikkikkut isumaqatissusiornissaannut ikiuutaassaaq.
Koruunit milliardilikkaat nalinginut aserfallatsaaliinissamik kinguaattooqqanerujussuaq attaveqaasersuutinut pingaarutilinnut, soorlu nunami maani inissianut, nukissiuutinik pilersuinermut timmisartoqarfinnullu sunniuteqarsimavoq.
Ajornartorsiutaasut taakku nassuiaattigineqarsimasunit arlallinit ilisimaneqarput, kinguaattooqqanermulli akiligassap qanoq akilerneqarnissaa politikkikkut suli aalajangiiffigineqanngilaq.
Aappaagumut aningaasanut inatsisissatut siunnersuummi unammilligassat Naalakkersuisunit allattorneqarsimapput, ilimasaarutigineqarporlu nuna tamakkerlugu pilersaarusiamut nassuiaammi susoqarnissaanik innersuussisoqassasoq.
- Naalakkersuisut neriuutigaat, nuna tamakkerlugu pilersaarummut nassuiaat aqqutigalugu, aserfallatsaaligassatut kinguaattoorutigineqarsimasut qanoq annertutigineri tamatumunngalu tunngaviusut tamakkiisumik takusinnaalissallugit. Nuna tamakkerlugu pilersaarummut nassuiaat 2022-mi kingusinnerusukkut saqqummiunneqassasoq naatsorsuutigineqarpoq. Nassuiaatitigut aamma kinguaattoorutigineqarsimasut qanoq isumagineqarsinnaanerat erseqqissaassutigineqassaaq, Naalakkersuisut siunnersuummi allapput.
Ineqarneq pillugu aaqqissuusseqqittoqartoq
Aningaasaqarnermut Naalakkersuisup Naaja H. Nathanielsenip oqaatigaa, kinguaattoorutigineqarsimasut politikkikkut eqqummaariffigineqarluartut aamma ineqarneq pillugu aaqqissuuteqqittamik ilaatigut saqqummiussisinnaaniarluni tamaviaarluni sulisoqartoq.
Apeqqut: Nuna tamakkerlugu pilersaarummut nassuiaat nutaaq utaqqimaarneqarpoq. Aaqqiissutissanik sooq saqqummiussisoqanngila, taakkulu inissinniarlugit isumaqatiginninniartoqarluni?
- Tamatuma anguniagaanera qularutigineqassanngilaq. Tamatumunnga aningaasanik maannakkorpiaq immikkoortitsisimavugut. Aningaasat ineqarfiit immikkoortortaqarfiinut ajornartorsiuteqartunut atorneqassapput.
- Suleqatitsialamma ineqarnermut tunngatillugu siunnersuutissaq suliarileruttorpaa. Aningaasanut inatsisissap suliarineqartarnera aasaaneranilu sulinngiffeqarnissap nallinnginnerani naammassineqarniartarnera ajornakusoortarpoq. Taamaammat arlalippassuit naammassillugit suliarineqanngitsoortarput, Naaja H. Nathanielsen oqarpoq.
Aningaasat amerlanerusut pisariaqartinneqartut
Naalakkersuisup erseqqissaassutigaa, aaqqiissutissatut suliarineqartut aningaassanut inatsisini arlalinni aningaasat amerlanerusut immikkoortinneqartarnissaasa pisariaqartinneqarnissaat ilimanarsinnaasoq:
- Aserfallatsaaligassatummi kinguaattoorutigineqarsimasut aningaasanut inatsit ataaseq kisiat aqqutigalugu aaqqiiffigineqarsinnaanngillat. Aningaasanut inatsimmi aningaasanik immikkoortitsisoqartussaavoq, ullumikkullu immikkoortitsisarnernit amerlanerusunik immikkoortitsisoqartariaqarluni. Matumani ineqarneq, umiarsualiveqarneq allalluunniit pineqaraluarpataluunniit, naalakkersuisoq oqarpoq.
Susassaqarfimmut ataatsimut tunngatillugu aningaasanut inatsisissatut siunnersuummi aaqqiissutissarsisoqarsimavoq. Matumani pnearpoq timmisartoqarfiit qulimiguulinnullu mittarfiit aserfallatsaalineqarnissaannik kinguaattooqqaneq, tamanna en milliard koruuninik naleqassasoq missingerneqarsimavoq.
Mittarfeqarfinnut tunngatillugu aaqqiissutissarsiortoqartoq
Mittarfeqarfiit ukiap ingerlanerani aktiaatileqatigiiffinngortinneqarnissaat Kalaallit Airportsimullu immikkoortortaqarfinngortinneqarnissaat sulissutigineqarpoq. Tassunga atatillugu naatsorsuutigineqarpoq, Namminersorlutik Oqartussat Mittarfeqarfinnik kiffartuussinissamik isumaqatigiissuteqassasut, tassa ingerlatseqatigiiffik kinguaattoorutinik isumaginnittussanngorlugu:
- Mittarfeqarfiit aktiaatileqatigiiffinngortinneqarnerannut atatillugu aserfallatsaaliinissamik kinguaattoorutigineqarsimasut naatsorsorneqassapput, aamma piffissaq ungasinnerusoq eqqarsaatigalugu aserfallatsaaliinissamut ingerlatsinissamullu missingeruusiortoqassaaq. Taamaalilluni mittarfeqarfinnik qulimiguulinnullu mittarfinnik aserfallatsaaliinissamik kinguaattoorutigineqarsimasut piffissap ingerlanerani isumagineqarsinnaalissallutik.
- Taamaalilluni nunami tamarmi timmisartoqarfiit tamarmik siunissami isumannaatsumik atorneqarsinnaanerat qulakkeerneqassaaq, aamma timmisartoqarfinni atortut illuutigineqartullu aserfallatsaalineqarsinnaalissapput, aningaasanut inatsissatut siunnersuummi allassimavoq.