uranimik oqallinneq

Naalakkersuisut: Kalaallit uraniutaat qaartartunut atorneqassanngilaq

Vittus Qujaukitsup (S) allakkatigut Muté Bourup Egedemut (IA) akissuteqarnermini aatsitassaqarnermut politikini pillugu arlalinnik oqaluttuarpoq, aamma savimineq uranitut sooq suliarineqarneq ajornersoq akissuteqarfigaa

Niuernermut nunatut allanullu tunngasunut naalakkersuisoq, Vittus Qujaukitsoq (S)

Narsami suliniut aatsitassanik qaqutigoortunik aamma uranimik misissuiffigineqarnera akisoorujussuunikuuvoq, Namminersorlutillu Oqartussat qinnuteqaat itigartitsissutigigunikku tutsuiginanngitsutut isikkoqalissapput.

Tamakku allakkatigut marlunngormat akissutit takinerusup Vittus Qujaukitsup (S) illuatungiliuttumut Muté Bourup Egedemut (IA) ilagaat.

Kalaallit Nunaat eqqornerliugaassasoq
Bourup Egedep niuernermut aamma nunanut allanut tunngasunut naalakkersuisoq ilaatigut aperaa, aatsitassarsiorfiup qinnuteqaataa itigartinneqarpat Nunatsinnut qanoq kinguneqassanersoq.

- Piiaanissamut piumasaqaatit naammassineqartillugit, piaanisssamut itigartitsisoqarpoq, Kalaallit Nunaata aatsitassanik piiaanermut tunngatillugu tutsuiginanngitsutut suleqatigiiffittut isikkoqalernissaa, qularnanngitsumillu Kalaallit Nunaanni aatsitassanik ujaasinermik piiaanermillu aningaasaliinissamik aatsitassanik tunisassiorfissuup soqutiginninnerata annikillinissaanik nassataqassalluni, Qujaukitsoq naliliivoq.

Atuaruk: Isummani mumisippaa: Steen Lyngep uranimut siunnersuunni tunuartippaa

Taassuma nassuiapaa, Greenland Minerals and Energyp 2005-mili 480 millionit koruunit Kuannersuarni misissuinerminni aningaasartuutigereerai.

Múte Bourup Egede, aamma Ataatsitassanut Ataatsimiititaliami ilaasortaasoq, Naalakkersuisut ingerlatsivimmut neriorsuuteqarsimanersut aperivoq, Qujaukitsulli taamaannginnerarpaa.

Namminersorlutik Oqartussanut ajornartorsiut?
Illuatungiliuttuni politikerip Vittus Qujaukitsoq qinngasaarerpalaartumik naalagaaffeqatigiinnermut tunngasumik urani pillugu aperivoq: Kalaallit Nunaannit uranip avammut nioqqutigineqarnera kiap akisussaaffigaa, Danmarkiuppat taava namminersornermut inatsit 2009-meersumut mangiarneqassava?

Atuaruk: Steen Lyngep partiiminit taperserneqannginnini ugguaraa

- Naamik, Siumumi politikeri akivoq.

Tassami uranimut malittarisassat illersornissamut aamma sillimaniarnissamullu politikki kalluarmagu, tamannalu Danmarkip akisussaaffigaa.

Nunatsinnit qaartartoqassanngitsoq
Qujaukitsup aamma IA-mi politikeri inuusuttoq akissuteqarfigaa, Naalakkersuisut Kalaallit Nunaannit uranip taamaallaat eqqissinerrnut sorsunnerunngitsumullu siunertanut atornissaanut siunertarigaat

- Nunat tamalaani pisussaaffigisanik naapertuutsitsinerrnut peqataaqataanerrnigut nunarsuarrnut toqqissisimanamerusumut sorsunnertaqanngitsumullu Kalaallit Nunaata aamma akisussaaffeqartinnissaata oqaatigissavara, allakkatigut akissuteqarnermini neriorsuivoq.

Atuaruk: Aatsitassanut naalakkersuisunngorlaaq: Innuttaasut taasitinneqarnissaat puiguinnarsiuk

Illuatungiliuttunillu uumisaarineq tamaanga killeqanngilaq.

Savimineq nakkutigineqartussaanngitsoq
Tassami Bourup Egedep aamma paaserusuppaa, saviminissaq aamma danskinit nakkutigineqassannginnersoq, tassami saviminissaq uranitulli ulorianartunut, soorlu aallaasiliornernut atorneqarsinnaammat?

Kisianni Naalakkersuisut 'naaggamik' akipput. Saviminissaq dual-usetut atortutut ulorianartutut taaneqarneq ajormat, niuerutigineqarneralu nakkutigineqartariaqarani.

Atauruk: Urani pillugu ICC Qaqortumi ataatsimiissaaq

Atuaruk: Uranimik isumaqatigiissutip kingorna GME-p aktiaatimi nalinga qaffatsippaa

Powered by Labrador CMS