Naalakkersuisut kajumissutsimik suliaqartut amerlanerulersinniarpaat

Inuiaqatigiinni ikiuerusuttut amerlanerussapput. Naalakkersuisut 2022-mi innuttaasut kajumissutsiminnik suliaqarnissamut periarfissaat erseqqinnerulersinniarlugit tapersersortissarsiornermik aallartitsiniarput.

Sapaatiummat ulloq tassaavoq Aningaasaqarnikkut Inooqatigiinnilu Ineriartornissamut Nammineq Kajumissutsimik Suliaqarneq pillugu Naalagaaffiit Peqatigiit Nunarsuaq tamakkerlugu ullorititaat, ullormut tassunga atatillugu Meeqqanut, Inuusuttunut Ilaqutariinnullu Naalakkersuisoq, Paneeraq Olsen, innuttaasut amerlanerusut kajumissutsimik suliaqalernissaannut tapersersuinermik aallartitsiniartut ilisimatitsivoq.

- Arlagut nammineq kajumissutsiminnik suliaqareerput. Amerlasuusugut nammineq kajumissutsimik suliaqarnermi ikiuerusuttarpugut. Imminut ikioqatigiittarneq ataatsimoornermik misigissutitsinnut ilanngussisarpoq. Peqatigiiffimmi suliniaqatigiiffimmiluunniit nammineq kajumissutsimik suliaqarluni inunnik siuningaani ilisimasarereertariaqanngisanik isumassuisoqartarpoq. Aamma inuit imminnut ikioqatigiittarnerat nuannersuujuaannarpoq, soorlu uagut maani Kalaallit Nunatsinni taamaaliortuartartugut, taanna oqarpoq.

Kalaallit danskillu suleqatigiinnerat
Meeqqanut suliassaqarfimmi nammineq kajumissutsiminnik sulialinnut sinaakkusiunneqartut patajaallisaaffigineqarnerat meeqqanut inuusuttunullu atugarliortunut suliniutit pitsanngorsaavigineqarnissaannut Kalaallit- qallunaallu oqartussaasoqarfiisa assigiinngitsunik suliallit akornanni suleqatigiinnermi immikkut ittumik suliniutaavoq, Naalakkersuisoq tusagassiuutinut nalunaarummi ilisimatitsivoq.

Nammineq kajumissutsimik sulinerup naleqarnera, kissaatigigaannilu ajornannginnerusumik nammineq kajumissutsimik sulilersinnaanissaq suliap erseqqissaaqataaffigissavaa. Nammineq kajumissutsimik sulinermut sinaakkusiussat patajaallisaaffiginerisigut, suliniaqatigiiffiit nammineq kajumissutsiminnik sulerusuttunik amerlanernik pissarsisinnaanngussapput. Aamma nammineq kajumissutsimik suliaqartup suliaa annertunerusumik pissarsiaqarfigisinnaanngussavaat.

- Kalaallit- qallunaallu suleqatigiinnerisa ataanni suliniutini meeqqat inuusuttullu atugarliortut ikiorniarlugit isiginniffiit assigiinngitsorpassuit isiginiarneqarput. Suliniutip massuma meeraannaanngitsut inuusuttuinnaanngitsullu qularnanngitsumik angussavai. Nammineq kajumissutsimik suliniaqatigiiffiit tamaasa patajaallisaavigisinnaavai, Paneeraq Olsen oqarpoq.

Kajumissutsimik suliaqartunut sinaakkutit pitsanngorsarnerisigut suliniaqatigiiffiit amerlanerusunik kajumissutsimik sulisoqalersinnaasut, taanna ilisimatitsivoq.

Powered by Labrador CMS