Naalakkersuisut Ittoqqortoormiinut immikkut qernertanik qilalugartassiisut
Naalakkersuisut Kommuneqarfik Sermersooq kajumissaarpaat, immikkut pisassiissutit inuussutissarsiutigalugu piniarsinnaanermik allagartalinnut piniaqatigiinnikkut pisarineqassasut.
Naalakkersuisut oktobarip qaammataata aallartinnerani sumiiffiit sisamat immikkut qilalukkanik qernertanik pisassippaat.
Ittoqqortoormiit maanna immikkut qilalukkanik qernertanik pisassinneqarput.
- Naalakkersuisut aalajangersimapput Ittoqqortoormiit immikkut arfinilinnik qernertanik qilalugartassinneqassasut. Naalakkersuisut Kommuneqarfik Sermersooq kajumissaarpaat immikkut pisassiissutit inuussutissarsiutigalugu piniarsinnaanermik allagartalinnut piniaqatigiinnikkut pisarineqassasut. Qernertarniarneq aatsaat aallartissinnaavoq piniaqatigiinnissami ilaasussat aqqi kommunep allaffiani toqqarneqareerpata, Namminersorlutik Oqartusat tusagassiorfinnut nalunaaruteqarnerminni allapput.
Aalisarnermut, Piniarnermut Nunalerinermullu Naalakkersuisoqarfiup erseqqissaassutigaa, immikkut pisassiissutiniit pisarineqanngitsoortut ukiup tulliani pisassiissutissanut nuunneqarsinnaanngitsut.