Naalakkersuisut isumannaallisaanermut politikkimi suleqatigiissitamut peqataatinneqartut

Nunanut allanut isumannaallisaanermullu politikki allanngoriartupiloormat taakkununnga atatillugu politikkissaq qulaajaaffigineqassaaq.

Nunanut allanut ministeeriaqarfik tusagassiorfinnut nalunaaruteqarluni allappoq, nunat tamalaat malittarisassanik tunngaveqarlutik suleqatigiinnerat mianernartortaqalersimasoq aamma naalagaaffiit pissaanilissuit imminnut unammiuaaqqilersimasut.

Tamanna pissutigalugu Danmarkimi naalakkersuisut nalilersuisussanik pilersitsisimapput, taakku nunanut allanut isumannaallisaanermullu politikkikkut inissisimasoqarneranik nalilersuillutillu Kunngeqarfimmut tamarmut Illersornissamullu mianernartuusinnaasunik kinguneqaataasinnaasunillu nassuiaasiussapput. Nalilersuisimanermi angusat tullissaanik illersornissatigut isumaqatigiissutissap piareersarneqarneranut ilaatinneqassaaq.

Annertusaaneq

- Danmarkimi naalakkersuisut nunanut allanut isumannaallisaanermullu politikkimut atatillugu misissueqqissaartarnermik ilisimasaqassutsimillu annertusaaniarput. Danmarki NATO-mi iligiinnut ilaalluinnarpoq. Nunarsuarmi sorsuffiusuni ajunngivissumik sunniuteqarluartumillu suleqataasarpugut. Taamatut pitsaatigisumik suleqataasarnerput attatiinnassavarput aamma nukivut allanngueqataaffiunerpaasussanut atortassavagut. Nalilersuinitsigut piareersarfigissavagut illersornissatigut isumaqatigiissutissami unammilligassaasinnaasut aamma Danmarkimi naalakkersuisut ukiuni aggersuni nunanut allanut isumannaallisaanermullu politikikkut periusissiassaat ukioq manna kingusinnerusukkut saqqummiunneqartussaq, Nunanut allanut Ministeri Jeppe Kofod oqarpoq.

Illersornissamut ministeri Trine Bramsen imatut oqaaseqarpoq:

- Isuannaatsuunermut ulorianartorsiortitsineq ukiuni makkunani allanngorpoq. Ajoraluarmik ajornerulersumik. Ulorianartorsiortitsisut amerliartorlutillu ingasanneruleriartorput. Taamaammat taamatut ineriartortoqarnera piareersimaffigissavarput aamma isumannaatsuunerput nukinnik atuiffiginerussavarput. Isumatusaarluta aningaasaliissuteqassaagut aamma atortussanut atugassatsinnut - taamaammat patajaattumik tunngaveqarnissarput pingaaruteqarluinnarpoq. Tassanilu nalilersuineq aalajangiisuulluinnassalluni.

Nalilersuisussat inuttalerneqassapput Nunanut allanut Ministeeriaqarfimmeersunit, Illersornissamut Ministeeriaqarfimmeersunit, Aningaasaqarnermut Ministeeriaqarfimmeersunit Inatsisinillu atuutsitsinermut Ministeeriaqarfimmeersunit kiisalu Illersornissaqarfimmeersunit. Kalaallit Nunaanni Naalakkersuisut aamma Savalimmiuni Naalakkersuisut Issittumi Atlantikullu Avanaani pissutsinut tunngassuteqartut sammineqarneranni peqataatinneqassapput. Ministeriuneqarfik alaatsinaattutut peqataatitaqassaaq.

Tamanut saqqummiussinissaq

Nalilersuineq tullissaanik illersornissatigut isumaqatigiissutissap piareersarneqarneqarneranut ilanngunneqarnissaa siunertaralugu kingusinnerpaamik 2020-p aallartinnerani naammassineqarnissaa naatsorsuutigineqarpoq. Nalunaarusiornermut atatillugu nalilersuisimaneq tamanut saqqummiunneqassaaq.

Nalilersuineq ambassadørimit Michael Zilmer-Johnsimit aqunneqartoq aallartinneqareerpoq.